ആലപ്പുഴ: ചാനല്‍ ചര്‍ച്ചയ്ക്കിടെ കലാപത്തിന് ആഹ്വാനം ചെയ്ത സംഭവത്തില്‍ രാഹുല്‍ ഈശ്വറിനെതിരെ കേസെടുക്കാന്‍ കോടതി നിര്‍ദ്ദേശം. ആലപ്പുഴ ജില്ലാക്കോടതിയാണ് നിര്‍ദ്ദേശം നല്‍കിയത്. ക്രമസമാധാനപാലനം തകര്‍ക്കുന്നതിനും, മതസ്പര്‍ധ വളര്‍ത്തുന്നതിനും കാരണമാണ് രാഹുല്‍ ഈശ്വറിന്റെ വാക്കുകള്‍ പ്രേരണ നല്‍കുന്നതാണ് എന്നും കോടതി നിരീക്ഷിച്ചു.

ശബരിമലയില്‍ സ്ത്രീപ്രവേശനം അനുവദിച്ച സുപ്രിംകോടതിവിധിക്കെതിരെ കലാപം നടത്താനാണ് ടെലിവിഷന്‍ പോലൊരു മാധ്യമം രാഹുല്‍ ഈശ്വര്‍ ഉപയോഗിച്ചതെന്നും കോടതി ചൂണ്ടിക്കാട്ടി. ശബരിമലയില്‍ സ്ത്രീകള്‍ പ്രവേശിക്കുന്നത് ആചാര വിരുദ്ധമാണെന്നും നൈഷ്ഠിക ബ്രഹ്മചാരിയായ അയ്യപ്പന്റെ ബ്രഹ്മചര്യത്തിന് വിഘാതമാകുമെന്നും പറഞ്ഞാണ് വിശ്വാസികളോട് തെരുവിലിറങ്ങാന്‍ രാഹുല്‍ ആവശ്യപ്പെട്ടിരുന്നത്.