കൊച്ചി: ഇന്നലെ രാത്രി മുതല്‍ തുടങ്ങിയ കനത്തമഴയില്‍ കൊച്ചിയില്‍ റോഡ് തകര്‍ന്നു. കനത്തമഴയില്‍ ഇടപ്പളളി വട്ടേക്കുന്നത്തെ റോഡാണ് തകര്‍ന്നത്. ഇവിടെ പാര്‍ക് ചെയ്തിരുന്ന കാറുകള്‍ പത്തടി താഴ്ചയിലേക്ക് വീണു.

ഇന്നലെ രാത്രി മുതല്‍ ആരംഭിച്ച മഴ ഇന്ന് ഉച്ചയായിട്ടും തുടരുകയാണ്. നഗരത്തിലെ പ്രധാന റോഡുകള്‍ വെളളക്കെട്ടായി. ഇതോടെ ഗതാഗതകുരുക്ക് നഗരത്തില്‍ രൂക്ഷമായിരിക്കുകയാണ്. ഇടപ്പളളി, പാലാരിവട്ടം, പനമ്പിളളി നഗര്‍ എന്നിവിടങ്ങളില്‍ പുഴയ്ക്ക് സമാനമായാണ് വെളളക്കെട്ട് രൂപപ്പെട്ടിരിക്കുന്നത്. 

എറണാകുളം സൗത്ത് റെയില്‍വേ സ്റ്റേഷനിലും വെളളക്കെട്ട് രൂക്ഷമാണ്. പുഴയ്ക്ക് സമാനമായി വെളളം ഒഴുകുന്ന ചിത്രങ്ങള്‍ വ്യാപകമായാണ് പ്രചരിക്കുന്നത്.