കോട്ടയം: പിരിച്ചുവിട്ട നഴ്‌സുമാരെ തിരിച്ചെടുക്കണമെന്ന ആവശ്യവുമായി കോട്ടയം തിരുനക്കര ഭാരത് ആശുപത്രിയില്‍ നഴ്‌സുമാര്‍ നടത്തിയ സമരത്തിനിടെ സംഘര്‍ഷം. സമരം ചെയ്യുന്ന നഴ്‌സുമാരെ പൊലീസെത്തി നീക്കിയതാണ് സംഘര്‍ഷത്തിന് ഇടയാക്കിയത്. വേതന വര്‍ധനവ് ആവശ്യപ്പെട്ട് സമരം ചെയ്തതിനെ തുടര്‍ന്ന് അഞ്ച് നഴ്‌സുമാരെ പിരിച്ചുവിട്ടിരുന്നു. പിരിച്ചുവിട്ട ജീവനക്കാരെ തിരിച്ചെടുക്കണമെന്നാതാണ് സമരക്കാരുടെ ആവശ്യം. ഭാരത് ആശുപത്രിയുടെ കവാടത്തിലാണ് നഴ്‌സുമാരുടെ സമരം.

പൊലീസെത്തി നഴ്‌സുമാരെ അറസ്റ്റ് ചെയ്യുന്നതിനിടെയുണ്ടായ സംഘര്‍ഷത്തില്‍ നിരവധി നഴ്‌സുമാര്‍ക്ക് പരുക്കേറ്റു. യുഎന്‍എ സംസ്ഥാന പ്രസിഡന്റ് ജാസ്മിന്‍ ഷാ ഉള്‍പ്പെടെയുള്ളവര്‍ സമരത്തിനെത്തിയിരുന്നു. സംഘര്‍ഷത്തില്‍ പ്രതിഷേധിച്ച് നാളെ യുഎന്‍എയുടെ ഭാഗമായി കരിദിനമാചരിക്കാനും സംഘടന തീരുമാനിച്ചിട്ടുണ്ട്.

കഴിഞ്ഞ 35 ദിവസമായി ഭാരത് ആശുപതിയില്‍ സമരം തുടരുകയാണ്. വേതന വര്‍ധന, വസ്ത്രം മാറുന്ന സ്ഥലത്ത് സ്ഥാപിച്ച സിസി ടിവി ക്യാമറ നീക്കം ചെയ്യുക തുടങ്ങിയ ആവശ്യങ്ങളും നഴ്‌സുമാര്‍ മുന്നോട്ട് വെച്ചിരുന്നു. എന്നാല്‍ നഴ്‌സുമാര്‍ ഉന്നയിച്ച പരാതികളിലൊന്നിലും ആശുപത്രി അധികൃതരുമായി സമവായത്തിലെത്താന്‍ കഴിഞ്ഞിട്ടില്ല.