തിരുവനന്തപുരം: ഗൾഫ്​ രാജ്യങ്ങൾക്ക്​ പെട്രോൾ എന്നതുപോലെയാണ്​ കേരളത്തിന്​ കരിമണലെന്ന്​ വ്യവസായി മന്ത്രി ഇ.പി ജയരാജൻ. ആലപ്പാ​ട്ടെ ഖനനം നിർത്തിവെക്കണമെന്ന്​ നിയമസഭ പരിസ്ഥിതി സമിതി പറഞ്ഞിട്ടില്ലെന്ന് മന്ത്രി നിയമസഭയിൽ പറഞ്ഞു. സമരത്തിന്​ പിന്നിൽ ബാഹ്യശക്തികളുണ്ടെന്നും ഇ.പി ജയരാജൻ ആവർത്തിച്ചു. 

മാനദണ്ഡങ്ങൾ പാലിച്ച്​ ജനങ്ങളുടെ സ്വത്തിനും ജീവനും ഹാനികാരമല്ലാത്ത രീതിയിൽ ഖനനം തുടരാമെന്നാണ്​ നിയമസഭ പരിസ്ഥിതി സമിതി വ്യക്തമാക്കിയിരിക്കുന്നത്.ഖനനം സംബന്ധിച്ച്​ ഒരു പരാതിയും സർക്കാറിനു മുന്നിൽ ഇതുവരെ എത്തിയിട്ടില്ല. ആലപ്പാട്ടെ ജനങ്ങൾക്ക് എന്തെങ്കിലും ബുദ്ധിമുട്ടുണ്ടെങ്കിൽ അത്​ പരിഹരിക്കുമെന്നും അദ്ദേഹം പറഞ്ഞു.
 
ആലപ്പാട്ടെ  അശാസ്​ത്രീയ ഖനനം തദ്ദേശവാസികളുടെ നിലനിൽപ്പിന്​ ​ ഭീഷണിയാണെന്നും സർക്കാർ വിഷയത്തിൽ ഇടപെടുന്നില്ലെന്നും പ്രതിപക്ഷം ആരോപിച്ചു.  ഇതിന്​​ മറുപടി പറയുകയായിരുന്നു മന്ത്രി.  വിഷയം സഭ നിർത്തിവെച്ച്​ ചർച്ച ചെയ്യണമെന്ന്​ ആവശ്യപ്പെട്ട്​ പ്രതിപക്ഷ എം.എൽ.എ പി. ടി തോമസ്​ ​ അടിയന്തരപ്രമേയത്തിന്​ നോട്ടീസ്​ നൽകി.