പച്ച മനുഷ്യരുടെ ജീവിതം കൊണ്ട് വെള്ളിത്തിരയില്‍ ഉത്സവം നടത്തിയ മഹാനായ ചലച്ചിത്രകാരന്‍. ഞാനടക്കമുള്ള നടന്‍മാരെയും, കാഴ്ചക്കാരെയും സിനിമാ വിദ്യാര്‍ത്ഥികളാക്കിയ മലയാള സിനിമയുടെ മാസ്റ്റര്‍ക്ക്, എന്റെ പ്രിയപ്പെട്ട സാറിന് പ്രണാമം- മോഹന്‍ലാല്‍ തന്റെ ഫേസ്ബുക്ക് പോസ്റ്റില്‍ എഴുതി.

ചെറിയ വേഷങ്ങളിലൂടെ സിനിമാലോകത്ത് എത്തിയ മോഹന്‍ലാലിന് നിരവധി നല്ല വേഷങ്ങള്‍ സമ്മാനിച്ച് നായകസ്ഥാനത്തേക്കെത്തിച്ചത് ഐവി ശശിയാണെന്നുവേണം പറയാന്‍. മോഹന്‍ലാലിന്റെ ആ മാടമ്പിവേഷങ്ങള്‍ തുടങ്ങിവച്ചതു പോലും ഐവി ശിയായിരുന്നു ദേവാസുരത്തില്‍. പിന്നീട് ലാലിന് അതേ പാറ്റേണിലുള്ള നിരവധി ചിത്രങ്ങളായിരുന്നു ലഭിച്ചത്. 

ഇടയ്‌ക്കെപ്പോഴോ വെച്ച് സംവിധായകന്‍ ചലച്ചിത്രമേഖലയില്‍ നിന്ന് വിട്ടുനിന്നെങ്കിലും മലയാളത്തിലെ സംവിധായകരുടെ പട്ടികയെടുക്കുമ്പോള്‍ ഇന്നും ആദ്യം മനസ്സിലെത്തുക ഇദ്ദേഹത്തിന്റെ പേര് തന്നെ.