മലപ്പുറം: എംഎല്‍എ സ്ഥാനത്ത് നിന്നും കെ.എം ഷാജിയെ അയോഗ്യനാക്കിയ ഹൈക്കോടതി ഉത്തരവിന് എതിരെ മുസ്‌ലിം ലീഗ് എംഎല്‍എ പി.കെ ബഷീര്‍. ഷാജിക്ക് എതിരായ വിധിക്ക് പിറകില്‍ കള്ളക്കളിയാണ്. തലയ്ക്ക് വെളിവില്ലാത്ത ജഡ്ജിമാരുടെ എല്ലാ വിധിയും നടപ്പാക്കേണ്ടതിലെന്ന് ഏറനാട് എംഎല്‍എയായ ബഷീര്‍ പറഞ്ഞു. 

തെരഞ്ഞെടുപ്പില്‍ വര്‍ഗീയ പ്രചാരണം നടത്തിയെന്നു കണ്ടെത്തിയതിനെ തുടര്‍ന്നാണ് അഴീക്കോട് എംഎല്‍എയായ കെഎം ഷാജിയെ ഹൈക്കോടതി അയോഗ്യനാക്കിയത്. തെരഞഞെടുപ്പില്‍ മത്സരിക്കുന്നതിന് ആറു വര്‍ഷം വിലക്കും കല്‍പ്പിച്ചിട്ടുണ്ട്. ഇത് ചോദ്യം ചെയ്ത് ഷാജി സുപ്രീംകോടതിയെ സമീപിച്ചെങ്കിലും ഉടനെ ഹര്‍ജി പരിഗണിക്കേണ്ടതില്ലെന്ന നിലപാടാണ് സുപ്രീംകോടതി സ്വീകരിച്ചത്. 

എംഎല്‍എ സ്ഥാനത്ത് നിന്ന് അയോഗ്യനാക്കിയത് സ്‌റ്റേ ചെയ്തുകൊണ്ടുള്ള ഉത്തരവ് നീട്ടണമെന്ന കെ.എം ഷാജിയുടെ ആവശ്യം അംഗീകരിക്കാനാവില്ലെന്ന് ഹൈക്കോടതിയും വ്യക്തമാക്കിയിരുന്നു. പതിനഞ്ച് ദിവസത്തേക്കായിരുന്നു സ്റ്റേ.  സ്‌റ്റേ നീട്ടണമെന്ന ഷാജിയുടെ ഹര്‍ജി കോടതി തീര്‍പ്പാക്കി. തുടര്‍ ഉത്തരവിന്റെ ആവശ്യമില്ലെന്നും കോടതി വ്യക്തമാക്കി.