തൃശൂർ; കൊളജിൽ പരീക്ഷ എഴുതിക്കൊണ്ടിരിക്കുന്നതിനിടെ എൻജിനീയറിങ് വിദ്യാർത്ഥി കുഴഞ്ഞുവീണ് മരിച്ചു. മൂവാറ്റുപുഴ കല്ലൂർക്കാട് പണ്ടാരിക്കുന്നേൽ ജോസിന്റെ മകൻ പോൾ (21) ആണ് മരിച്ചത്. കൊടകര സഹൃദയ എൻജിനീയറിങ് കോളജിലെ മൂന്നാംവർഷ കംപ്യൂട്ടർ സയൻസ് വിദ്യാർഥിയായിരുന്നു. ചൊവ്വാഴ്‌ച ഉച്ചയ്ക്ക് ഒരുമണിയോടെയാണ് സംഭവം.

പരീക്ഷ എഴുതുന്നതിനിടയ്ക്ക് പോൾ കുഴഞ്ഞുവീഴുകയായിരുന്നു. ഉടൻതന്നെ കൊടകരയിലെ സ്വകാര്യ ആശുപത്രിയിൽ എത്തിച്ചെങ്കിലും കുറച്ചുസമയത്തിനുശേഷം മരിച്ചു. കായികതാരമായ പോൾ കഴിഞ്ഞയാഴ്‌ച തിരുവനന്തപുരത്ത് നടന്ന കെ.ടി.യു. കായികമേളയിൽ ജാവലിൻ, ഡിസ്‌കസ് ത്രോ എന്നീ മത്സരങ്ങളിൽ പങ്കെടുത്ത് ഫൈനലിൽ എത്തിയിരുന്നു. മൃതദേഹം ചാലക്കുടി താലൂക്ക് ആശുപത്രിയിലേക്ക് മാറ്റി. ബുധനാഴ്‌ച തൃശ്ശൂർ ഗവ. മെഡിക്കൽ കോളേജിൽ പോസ്റ്റ്മോർട്ടം നടക്കും.