തിരുവനന്തപുരം : മുഖ്യമന്ത്രി പിണറായി വിജയന്‍ ഉത്തര കൊറിയന്‍ ഏകാധിപതി കിം ജോങ് ഉന്നിനെപ്പോലെയാണെന്ന് കേന്ദ്രമന്ത്രി ഗിരിരാജ് സിംഗ്. കിമ്മിനെപ്പോലെയാണ് നോട്ടത്തിലും പെരുമാറ്റത്തിലും പിണറായിയും ചെയ്യുന്നത്. ഉത്തരകൊറിയയില്‍ കിം ചെയ്യുന്നതുപോലെ, സംസ്ഥാന സര്‍ക്കാരിനെതിരെ ശബ്ദമുയര്‍ത്തുന്നവരെ ശാരീരികമായി ഇല്ലായ്മ ചെയ്യുകയാണ് സിപിഎം ചെയ്യുന്നതെന്നും കേന്ദ്രമന്ത്രി ആരോപിച്ചു. 

സിപിഎം കോഴിക്കോട് ജില്ലാ സമ്മേളനത്തിനിടെ, പിണറായി വിജയന്‍ ഉത്തരകൊറിയന്‍ ഭരണാധികാരി കിം ജോങ് ഉന്നിനെ പ്രകീര്‍ത്തിച്ച് സംസാരിച്ചിരുന്നു. ഇത് ചൂണ്ടിക്കാട്ടിയപ്പോഴാണ് കേന്ദ്രമന്ത്രിയുടെ പ്രതികരണം. 

സാമ്രാജ്യത്വ ശക്തികളായ അമേരിക്കക്കെതിരെ, കമ്യൂണിസ്റ്റ് ചൈനയേക്കാള്‍ മികച്ച ചെറുത്തുനില്‍പ്പാണ് കിമ്മിന്റെ ഉത്തരകൊറിയ നടത്തുന്നതെന്നായിരുന്നു പിണറായി വിജയന്‍ അഭിപ്രായപ്പെട്ടത്.