തിരുവനന്തപുരം: പ്രശസ്ത ശാസ്ത്രജ്ഞനും ശാസ്ത്ര പ്രചാരകനുമായ മണപ്പുറത്ത് പ്രഫസർ എം വി ജോർജ് അന്തരിച്ചു. 91 വയസ്സായിരുന്നു. സംസ്കാരം ഇന്ന് രാവിലെ 11.30ന് നടക്കും. ഇന്നു 8.30 ന് നന്തൻകോട് ജറുസലം മാർത്തോമ്മാ പള്ളിയിൽ എത്തിക്കുന്ന മൃതദേഹം അവിടെ പൊതുദർശനത്തിനു വയ്ക്കും. 10.15 ന് ആരംഭിക്കുന്ന സംസ്കാര ശുശ്രൂഷകൾക്കു ശേഷം നെട്ടയം മലമുകൾ സെമിത്തേരിയിൽ സംസ്കാരം നടത്തും. 

പ്രകാശ രസതന്ത്ര മേഖലയിൽ നിസ്തുല സംഭാവനങ്ങൾ നൽകിയ പ്രഫ.ജോർജ് ഐഐടി കാൺപൂർ രസതന്ത്ര വിഭാഗം മേധാവിയായും പ്രവർത്തിച്ചിട്ടുണ്ട്. ഐഐടി കാൺപൂരിൽ നിന്നു വിരമിച്ച അദ്ദേഹം പാപ്പനംകോട് റീജനൽ റിസർച് ലബോറട്ടറിയിൽ പ്രകാശ രസതന്ത്ര ഗവേഷണത്തിനായി പ്രത്യേക വിഭാഗം ആരംഭിച്ചിരുന്നു. റീജനൽ റിസർച് ലാബിനെ രാജ്യത്തെതന്നെ മികച്ച ഗവേഷണ സ്ഥാപനമാക്കി മാറ്റുന്നതിന് പ്രധാന പങ്ക് വഹിച്ചത് പ്രഫ.ജോർജ് ആണ്. 

ശാന്തിസ്വരൂപ് ഭട്നഗർ അവാർഡ്, ടിഡബ്ല്യുഎഎസ് അവാർഡ്, സിആർഎസ്ഐ ലൈഫ് ടൈം അച്ചീവ്മെന്റ് സ്വർണ മെഡൽ തുടങ്ങിയ ഉന്നത പുരസ്കാരങ്ങളും അദ്ദേഹത്തെ തേടിയെത്തിയിട്ടുണ്ട്. കൊല്ലം സ്വദേശികളായ പരേതരായ എം.ഒ.വർഗീസിന്റെയും സാറാമ്മ മാമ്മന്റെയും മകനാണ്. എം.വി.തോമസ് (ചെന്നൈ), റവ.ഡോ.എം.വി.ഏബ്രഹാം (കോട്ടയം), ഡോ.എം.വി.മാത്യു (ഷിക്കാഗോ), പരേതയായ തങ്കമ്മ ജേക്കബ് എന്നിവരാണ് സഹോദരങ്ങൾ.