പരപ്പനങ്ങാടി: മലപ്പുറം പരപ്പനങ്ങാടിയില്‍ യുവാവ് ട്രെയിനിന് മുകളില്‍ കയറി ആത്മഹത്യാഭീഷണി മുഴക്കിയത് യാത്രക്കാരെയും ജീവനക്കാരെയും ആശങ്കയിലാക്കി. കണ്ണൂര്‍  എറണാകുളം ഇന്റര്‍സിറ്റി എക്‌സ്പ്രസിന് മുകളില്‍ വലിഞ്ഞുകയറിയാണ് യുവാവ് ആത്മഹത്യാഭീഷണി മുഴക്കിയത്. തുടര്‍ന്ന് കാല്‍മണിക്കൂറോളം കഴിഞ്ഞാണ് ഇയാളെ അനുനയിപ്പിച്ച് താഴെയിറക്കാനായത്. 

മംഗലാപുരം സ്വദേശി റഹ്മാന്‍(25) ആണെന്നാണ് യുവാവ് പറയുന്നത്. ചെറുതായി മാനസികാസ്വാസ്ഥ്യം പ്രകടിപ്പിക്കുന്ന യുവാവ് അവ്യക്തമായാണ് കാര്യങ്ങള്‍ പറയുന്നത്. പരപ്പനങ്ങാടിയില്‍ നിന്ന് എന്‍ജിനില്‍ ഓടിക്കയറിയ യുവാവിനെ ലോക്കോ പൈലറ്റുമാര്‍ തടഞ്ഞുെവക്കാന്‍ ശ്രമിച്ചപ്പോള്‍ എന്‍ജിനു മുകളിലേക്ക് വലിഞ്ഞുകയറുകയായിരുന്നു. 

പിന്നീട് ട്രെയിനിന് മുകളിലൂടെ വൈദ്യുതിക്കമ്പി മേലുതട്ടാതെ ഓട്ടമായി. ഒടുവില്‍ യാത്രക്കാരും നാട്ടുകാരും അനുനയിപ്പിച്ച് താഴെ ഇറക്കുകയായിരുന്നു. ഇയാളെ പരപ്പനങ്ങാടി റെയില്‍വേസ്‌റ്റേഷനില്‍ തടഞ്ഞുെവച്ച് ഏഴുമണിയോടെ കോഴിക്കോട് ആര്‍പിഎഫിനു കൈമാറി. 4.57ന് പരപ്പനങ്ങാടിയിലെത്തിയ തീവണ്ടി 5.10നാണ് യാത്രയായത്.