തിരുവനന്തപുരം: സംസ്ഥാന മുഖ്യ തെരഞ്ഞെടുപ്പ് ഓഫിസര്‍ ടിക്കറാം മീണയ്‌ക്കെതിരെ ബിജെപി കേന്ദ്ര തെരഞ്ഞെടുപ്പു കമ്മിഷന് പരാതി നല്‍കി. തെരഞ്ഞെടുപ്പില്‍ ശബരിമല പ്രചാരണ വിഷയമാക്കരുത് എന്ന നിര്‍ദേശത്തിന് എതിരെയാണ് പരാതി.

ബിജെപി മുന്‍ സംസ്ഥാന കമ്മിറ്റി അംഗം പി കൃഷ്ണദാസ് ആണ് തെരഞ്ഞെടുപ്പു കമ്മിഷന് പരാതി നല്‍കിയത്. ശബരിമല പ്രചാരണ വിഷയം ആക്കരുതെന്ന നിര്‍ദേശം ദുരുദ്ദേശ്യപരമാണെന്ന് പരാതിയില്‍ പറയുന്നു. ചീഫ് ഇലക്ടറല്‍ ഓഫിസറുടേത് അധികാര ദുര്‍വിനിയോഗമാണെന്ന് ആരോപിക്കുന്ന പരാതിയില്‍ അദ്ദേഹത്തെ പദവിയില്‍ നിന്നു നീക്കണമെന്നും ആവശ്യമുണ്ട്. 

മതവിദ്വേഷം ജനിപ്പിക്കുംവിധം ശബരിമല വിഷയം പ്രചാരണ വിഷയമാക്കുന്നത് ചട്ടലംഘനമാവുമെന്ന് ടിക്കറാം മീണ കഴിഞ്ഞ ദിവസം വ്യക്തമാക്കിയിരുന്നു. ഇക്കാര്യം ഉള്‍പ്പെടെ ചര്‍ച്ച ചെയ്യാന്‍ നാളെ കമ്മിഷന്‍ രാഷ്ട്രീയ പാര്‍ട്ടികളുടെ യോഗം വിളിച്ചിട്ടുണ്ട്.

ശബരിമല ചര്‍ച്ചാ വിഷയമാക്കരുതെന്ന നിലപാടിനെതിരെ ബിജെപിയും കോണ്‍ഗ്രസും രംഗത്തുവന്നിട്ടുണ്ട്.