തിരുവനന്തപുരം: ലോക്ക്‌ഡൗണ്‍ മൂന്നാം ഘട്ടത്തില്‍ സ്വീകരിക്കേണ്ട നടപടികളെ സംബന്ധിച്ച്‌ സംസ്ഥാനം ഇന്ന്‌ അന്തിമ തീരുമാനമെടുക്കും. ബെവ്‌കോ മദ്യവില്‍പ്പന ശാലകള്‍ തിങ്കളാഴ്‌ച മുതല്‍ നിയന്ത്രണങ്ങളോടെ തുറക്കുമെന്നാണ്‌ സൂചന.
മദ്യശാലകള്‍ തുറക്കുന്നത്‌ സംബന്ധിച്ച അന്തിമ തീരുമാനം ജില്ലാ ഭരണകൂടങ്ങള്‍ക്കായിരിക്കുമെന്ന്‌ കേന്ദ്ര സര്‍ക്കാര്‍ വ്യക്തമാക്കിയിട്ടുണ്ട്. അവിടെ നിലനില്‍ക്കുന്ന സാഹചര്യം പരിശോധിച്ച്‌ മദ്യശാലകള്‍ തുറക്കാന്‍ അനുമതി നല്‍കണമോ എന്ന്‌ തീരുമാനിക്കേണ്ടത്‌ ജില്ലാ ഭരണകൂടമാണ്‌.
ബാറുകളില്‍ നിന്ന് മദ്യം പാഴ്‌സലായി കൊണ്ടുപോവാനും അനുവദിച്ചേക്കും. മെയ്‌ 15 വരെ ഭാഗീക ലോക്ക്‌ഡൗണ്‍ വേണമെന്നായിരുന്നു കേന്ദ്രത്തോട്‌ കേരളം ആവശ്യപ്പെട്ടത്‌. മുഖ്യമന്ത്രിയുടെ നേതൃത്വത്തില്‍ ചേരുന്ന ഉന്നത തല യോഗത്തിലായിരിക്കും സംസ്ഥാനത്ത്‌ തുടരേണ്ട നിയന്ത്രണങ്ങളെ കുറിച്ചും, മദ്യശാലകള്‍ തുറക്കുന്നതുള്‍പ്പെടെയുള്ള ഇളവുകളെ കുറിച്ചും അന്തിമ തീരുമാനമെടുക്കുക.
ഗ്രീന്‍ സോണുകളില്‍ ബസ്‌ സര്‍വീസ്‌ നടത്താന്‍ കേന്ദ്ര സര്‍ക്കാര്‍ അനുവാദം നല്‍കുന്നുണ്ടെങ്കിലും അത്‌ സംബന്ധിച്ച തീരുമാനം ഉടനുണ്ടാവാന്‍ സാധ്യതയില്ല. പകുതി യാത്രക്കാരെ വെച്ചുള്ള സര്‍വീസിനോട്‌ സ്വകാര്യ ബസുകള്‍ അനുകൂലമായി പ്രതികരിച്ചിട്ടില്ല. ഗ്രീന്‍ സോണില്‍ നിന്ന് റെഡ്‌ സോണായ കോട്ടയത്തിന്റെ ഉദാഹരണം മുന്‍പില്‍ വെച്ചാവും സംസ്ഥാനം കൂടുതല്‍ ഇളവുകള്‍ നല്‍കണമോ എന്നതില്‍ തീരുമാനമെടുക്കുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates