ഒട്ടാവ: കാനഡയുടെ ചരിത്രത്തിലെ ഏറ്റവും ഭീകരമായ കൂട്ടക്കൊലയ്ക്ക് കാരണമായ 1985-ലെ എയർ ഇന്ത്യ ഫ്ലൈറ്റ് 182 (ചക്രവർത്തി കനിഷ്ക) ബോംബാക്രമണത്തിന് പിന്നിൽ കാനഡ ആസ്ഥാനമായി പ്രവർത്തിക്കുന്ന ഖാലിസ്താൻ തീവ്രവാദികളാണെന്ന് കനേഡിയൻ രഹസ്യാന്വേഷണ ഏജൻസി ആദ്യമായി പരസ്യമായി സമ്മതിച്ചു. കനേഡിയൻ സെക്യൂരിറ്റി ഇന്റലിജൻസ് സർവീസ് പുറത്തുവിട്ട 2025-ലെ പൊതു റിപ്പോർട്ടിലാണ് ഈ നിർണ്ണായക വെളിപ്പെടുത്തലുള്ളത്.

ദുരന്തത്തിന്റെ 40-ാം വാർഷികം രേഖപ്പെടുത്തിയ കഴിഞ്ഞ വർഷത്തെ സംഭവവികാസങ്ങൾ ചൂണ്ടിക്കാട്ടുന്ന റിപ്പോർട്ടിൽ, ആക്രമണത്തിന്റെ പ്രതികൾ കാനഡ ആസ്ഥാനമായുള്ള ഖാലിസ്താൻ തീവ്രവാദ ഗ്രൂപ്പുകളിലെ അംഗങ്ങളായിരുന്നുവെന്ന് വ്യക്തമാക്കുന്നു. 329 പേരുടെ ജീവൻ നഷ്ടപ്പെട്ട ഈ ദുരന്തം കാനഡയുടെ ചരിത്രത്തിലെ ഏറ്റവും മാരകമായ ഭീകരാക്രമണമായി ഇന്നും തുടരുകയാണെന്നും റിപ്പോർട്ട് അടിവരയിടുന്നു. മുൻപത്തെ ഔദ്യോഗിക പ്രസ്താവനകളിലെല്ലാം "സിഖ് തീവ്രവാദികൾ" എന്ന് മാത്രം പൊതുവായി വിശേഷിപ്പിച്ചിരുന്ന കാനഡ, ചരിത്രത്തിലാദ്യമായാണ് 'ഖാലിസ്താൻ പ്രസ്ഥാനത്തിന്റെ' പേരെടുത്ത് പറഞ്ഞ് കുറ്റപ്പെടുത്തുന്നത്.

329 പേരുടെ ജീവനെടുത്ത 'കനിഷ്ക' ദുരന്തം

1985 ജൂൺ 23-നാണ് മോൺട്രിയാലിൽ നിന്ന് ലണ്ടൻ വഴി ഡൽഹിയിലേക്ക് വരികയായിരുന്ന എയർ ഇന്ത്യയുടെ ബോംബെ ഡിറ്റക്റ്റീവ് ബോയിംഗ് 747 വിമാനം അത്ലാന്റിക് മഹാസമുദ്രത്തിന് മുകളിൽ 31,000 അടി ഉയരത്തിൽ വെച്ച് ബോംബ് സ്ഫോടനത്തിലൂടെ തകർത്തത്. അയർലൻഡ് തീരത്തിന് സമീപം നടന്ന ദുരന്തത്തിൽ വിമാനത്തിലുണ്ടായിരുന്ന 329 യാത്രക്കാരും ജീവനക്കാരും തൽക്ഷണം കൊല്ലപ്പെട്ടു. ഇതിൽ 268 പേർ കനേഡിയൻ പൗരന്മാരായിരുന്നു, ഭൂരിഭാഗം പേരും ഇന്ത്യൻ വംശജരുമായിരുന്നു. കൊല്ലപ്പെട്ടവരുടെ സ്മരണയ്ക്കായി ടൊറന്റോ, വാൻകൂവർ, അയർലൻഡിലെ അഹകിസ്ത എന്നിവിടങ്ങളിൽ സ്മാരകങ്ങൾ നിർമ്മിച്ചിട്ടുണ്ട്. കാനഡയിൽ എല്ലാ വർഷവും ഈ ദിവസം ഭീകരാക്രമണ ഇരകളുടെ ദേശീയ അനുസ്മരണ ദിനമായി ആചരിക്കുന്നു.

പഞ്ചാബ് കേന്ദ്രീകരിച്ച് പ്രത്യേക ഖാലിസ്താൻ രാജ്യം സ്ഥാപിക്കാൻ ശ്രമിച്ച സിഖ് തീവ്രവാദ സംഘടനയായ 'ബബ്ബർ ഖൽസ ഇന്റർനാഷണൽ' ആണ് ഈ അട്ടിമറിക്ക് പിന്നിലെന്ന് അന്താരാഷ്ട്ര അന്വേഷണ ഏജൻസികൾ മുൻപ് കണ്ടെത്തിയിരുന്നു. കാനഡ കേന്ദ്രീകരിച്ച് പ്രവർത്തിച്ചിരുന്ന ബബ്ബർ ഖൽസ നേതാവ് തൽവിന്ദർ സിംഗ് പർമർ ആയിരുന്നു ഈ ക്രൂരതയുടെ മുഖ്യസൂത്രധാരൻ. ഇയാൾ പിന്നീട് 1992-ൽ ഇന്ത്യയിൽ പോലീസുമായുള്ള ഏറ്റുമുട്ടലിൽ കൊല്ലപ്പെട്ടു. സ്ഫോടനത്തിന് ആവശ്യമായ ബോംബുകൾ നിർമ്മിച്ച ഇന്ദർജിത് സിംഗ് റയാത് 2003-ൽ കുറ്റസമ്മതം നടത്തുകയും 15 വർഷത്തെ തടവുശിക്ഷയ്ക്ക് വിധിക്കപ്പെടുകയും ചെയ്തിരുന്നു

കനേഡിയൻ ഏജൻസികളുടെ ഗുരുതരമായ വീഴ്ച

ആക്രമണം നടക്കുന്നതിന് മുൻപ് തന്നെ മുഖ്യസൂത്രധാരനായ പർമറെ CSIS നിരീക്ഷിക്കുന്നുണ്ടായിരുന്നുവെന്നും എയർ ഇന്ത്യ വിമാനങ്ങൾക്ക് നേരെയുള്ള ഭീഷണിയെക്കുറിച്ച് മുൻകൂട്ടി മുന്നറിയിപ്പുകൾ ലഭിച്ചിരുന്നുവെന്നും റിപ്പോർട്ടിൽ പറയുന്നു. എന്നാൽ 2010-ൽ ജസ്റ്റിസ് ജോൺ സി. മേജറുടെ നേതൃത്വത്തിൽ നടന്ന അന്വേഷണ കമ്മീഷൻ, കനേഡിയൻ ഇന്റലിജൻസിന്റെയും റോയൽ കനേഡിയൻ മൗണ്ടഡ് പോലീസിന്റെയും "തുടർച്ചയായ വീഴ്ചകളും പിഴവുകളുമാണ്" ദുരന്തത്തിന് വഴിവെച്ചതെന്ന് കണ്ടെത്തി. ശരിയായ നിരീക്ഷണം നടത്തുന്നതിലും വിവരങ്ങൾ പരസ്പരം പങ്കുവെക്കുന്നതിലും ഏജൻസികൾ പരാജയപ്പെട്ടത് മൂലം ഗൂഢാലോചന തടയാനുള്ള സുവർണ്ണാവസരങ്ങൾ കാനഡയ്ക്ക് നഷ്ടമാവുകയായിരുന്നു.

കാനഡ ആസ്ഥാനമായുള്ള ഖാലിസ്താൻ ഭീകരരാണ് വിമാനം തകർത്തതെന്ന് ഇന്ത്യ ആവർത്തിച്ചു വ്യക്തമാക്കിയിരുന്നെങ്കിലും വോട്ട് ബാങ്ക് രാഷ്ട്രീയം മുൻനിർത്തി കനേഡിയൻ ഗവൺമെന്റുകൾ ഖാലിസ്താൻ എന്ന പേര് ഔദ്യോഗികമായി പരാമർശിക്കാൻ മടിക്കുകയായിരുന്നു. കാനഡ ആസ്ഥാനമായി പ്രവർത്തിക്കുന്ന ഖാലിസ്താൻ തീവ്രവാദികളുടെ അക്രമ പ്രവർത്തനങ്ങൾ ഇപ്പോഴും കാനഡയുടെ ദേശീയ സുരക്ഷയ്ക്കും വിദേശത്തുള്ള കനേഡിയൻ താല്പര്യങ്ങൾക്കും വലിയ ഭീഷണിയാണെന്ന് 2025-ലെ പുതിയ റിപ്പോർട്ടും മുന്നറിയിപ്പ് നൽകുന്നു. അതേസമയം, ഖാലിസ്താന് വേണ്ടിയുള്ള സമാധാനപരമായ വാദങ്ങളെ തീവ്രവാദമായി കാണുന്നില്ലെന്നും, എന്നാൽ കാനഡയെ താവളമാക്കി ഇന്ത്യയിൽ അക്രമം നടത്താനും പണം കണ്ടെത്താനും ശ്രമിക്കുന്ന ചെറിയൊരു വിഭാഗം ആളുകളുടെ നീക്കങ്ങളെ കർശനമായി നിരീക്ഷിക്കുമെന്നും കാനഡ വ്യക്തമാക്കിയിട്ടുണ്ട്.