ജലദോഷം മാറ്റാനായി മുക്കില്‍ വെളുത്തുള്ളി തിരുകി വച്ചാല്‍ മതിയോ? ഇന്റര്‍നെറ്റില്‍ ഇപ്പോള്‍ ഇതാണ് ചര്‍ച്ച.

റെസാലിന്‍ കാതറിന്‍ എന്ന യുവതി പങ്കുവച്ച വിഡിയോയാണ് ചര്‍ച്ചയ്ക്ക് ആധാരം. ടിക്ക് ടോക്കിലൂടെ റോസിലിന്‍ പുറത്തുവിട്ട വിഡിയോയില്‍ മൂക്കില്‍ പതിനഞ്ച് മിനിറ്റോളം വെളുത്തുള്ളി തിരുകി വയ്ക്കുകയാണ്. മൂക്കടപ്പ് മാറാന്‍ ഇത് മികച്ച വഴിയാണെന്നാണ് യുവതി പറയുന്നത്. മൂക്കില്‍ നിന്ന് അഴുക്ക് പോവുന്നതും ദൃശ്യങ്ങളിലുണ്ട്.

ആരോഗ്യ സംബന്ധമായ എന്തും വൈറല്‍ ആവുന്നത് സോഷ്യല്‍ മീഡിയയുടെ പൊതു സ്വഭാവമാണ്. റോസിലിന്റെ വിഡിയോയും അങ്ങനെ വ്യാപകമായി പ്രചരിച്ചു. ഇതിനു പിന്നില്‍ വല്ല സത്യവും ഉണ്ടോയെന്ന് എന്തായാലും വ്യക്തമായിട്ടില്ല.

പല വിധ പ്രതികരണങ്ങളാണ് വിഡിയോയ്ക്കു ലഭിക്കുന്നത്. ഇതു വെറും പ്രചാരണം മാത്രമാണെന്ന് ഒരു വിഭാഗം പറയുമ്പോള്‍ മികച്ച ഫലം ലഭിക്കുമെന്നാണ് മറുപക്ഷത്തിന്റെ വാദം.