സിയോൾ: ഉത്തര കൊറിയ ബാലിസ്റ്റിക് മിസൈൽ വിക്ഷേപിച്ചതായി റിപ്പോർട്ട്. പ്യോങ്ഗ്യാങ്ങിൽ നിന്ന് കിഴക്കൻ കടലിലേക്ക് മിസൈൽ വിക്ഷേപിച്ചതെന്നാണ് ദക്ഷിണ കൊറിയൻ സൈന്യം ആരോപിക്കുന്നത്. ഈ വർഷം ഉത്തര കൊറിയ നടത്തുന്ന എട്ടാമത്തെ മിസൈൽ പരീക്ഷണമാണ് ഇതെന്നും റിപ്പോർട്ടുകളുണ്ട്. 

ഈ വര്‍ഷം ജനുവരിയില്‍ മാത്രം ഉത്തര കൊറിയ 7 മിസൈല്‍ പരീക്ഷണങ്ങള്‍ നടത്തി. എന്നാല്‍ ഫെബ്രുവരില്‍ ഇതുവരെ ആയുധ പരീക്ഷണങ്ങളില്‍ നിന്ന് ഉത്തര കൊറിയ വിട്ടുനിന്നിരുന്നു. തങ്ങളുടെ സൗഹൃദ രാജ്യമായ ചൈനയില്‍ ശൈത്യകാല ഒളിംപിക്‌സ് നടക്കുന്നതിനെ തുടര്‍ന്നാണ് ഇതെന്നാണ് വിലയിരുത്തല്‍. 

ശൈത്യകാല ഒളിംപിക്‌സ് അവസാനിച്ചതോടെ ഉത്തര കൊറിയ വീണ്ടും ആയുധ പരീക്ഷണങ്ങളിലേക്ക് മടങ്ങിയതാവാം എന്നാണ് റിപ്പോര്‍ട്ട്. റഷ്യയുടെ യുക്രൈന്‍ അധിനിവേശത്തിലേക്ക് യുഎസ് ഉള്‍പ്പെടെയുള്ള ലോക രാജ്യങ്ങള്‍ ശ്രദ്ധ കൊടുത്ത് നില്‍ക്കുമ്പോഴാണ് ഉത്തര കൊറിയയുടെ ബാലിസ്റ്റിക് മിസൈല്‍ പരീക്ഷണം വരുന്നത്.