ഒട്ടാവ: വെള്ളച്ചാട്ടത്തിന് സമീപം  കുടുങ്ങിപ്പോയ രണ്ട് സഞ്ചാരികളെ സിഖുകാര്‍ രക്ഷിക്കുന്ന ദൃശ്യങ്ങള്‍ വൈറലാകുന്നു. തലപ്പാവ് അഴിച്ച് കയര്‍ പോലെ കെട്ടി താഴേക്ക് ഇട്ടുകൊടുത്താണ് സഞ്ചാരികളെ വലിച്ചുകയറ്റിയത്. 

ബ്രിട്ടീഷ് കൊളംബിയയിലെ ഗോള്‍ഡന്‍ ഇയേഴ്‌സ് പ്രൊവിന്‍ഷ്യല്‍ പാര്‍ക്കിലാണ് സംഭവം. കുല്‍ജിന്ദര്‍ കിന്ദയും സുഹൃത്തുക്കളും മലക്കയറ്റിന് എത്തിയപ്പോഴാണ് രണ്ടു സഞ്ചാരികള്‍ വെള്ളച്ചാട്ടത്തിന് സമീപം കുടുങ്ങി കിടക്കുന്നത് കണ്ടത്. പാറയില്‍ നിന്ന് കാല്‍വഴുതി താഴേക്ക് വീഴുകയായിരുന്നു. 

പാറയില്‍ നിന്ന് വെള്ളച്ചാട്ടത്തിന് തൊട്ടുമുകളിലാണ് ഇവര്‍ വീണത്. ഇവിടെ നിന്ന് മുകളിലേക്ക് കയറാന്‍ കഴിയാതെ ബുദ്ധിമുട്ടിയ രണ്ട് സഞ്ചാരികളെയാണ് തലപ്പാവ് അഴിച്ച് കയര്‍ പോലെ കെട്ടി താഴേക്ക് ഇട്ടുകൊടുത്ത് സിഖുകാരുടെ സംഘം രക്ഷിച്ചത്. ഇവരെ മുകളിലേക്ക് വലിച്ചു കയറ്റുകയായിരുന്നു. ഇതിന്റെ ദൃശ്യങ്ങള്‍ വ്യാപകമായാണ് പ്രചരിക്കുന്നത്.