വാഷിങ്ടണ്‍: 21 വര്‍ഷം മുന്‍പ് നടന്ന ഇരട്ടക്കൊലപാതകത്തിലെ പ്രതിയുടെ വധശിക്ഷ നടപ്പിലാക്കി അമേരിക്ക. മോഷണ ശ്രമത്തിനിടെ രണ്ട് ഹോട്ടല്‍ ജീവനക്കാരെ കൊലപ്പെടുത്തിയ കേസിലെ പ്രതിയായ ഡൊണാള്‍ഡ് ഗ്രാന്റിന്റെ വധശിക്ഷയാണ് നടപ്പാക്കിയത്. 
‌‌
2001ല്‍ ഡൊണാള്‍ഡിന് 25 വയസ്സുള്ളപ്പോഴാണ് കൊലപാതകം നടന്നത്. ജയിലില്‍ കഴിയുകയായിരുന്ന കാമുകിയെ ജാമ്യത്തിലിറക്കാനുള്ള പണം കണ്ടെത്താൻ മോഷണം നടത്തുന്നതിനിടെയാണ് കൊലപാതകം നടന്നത്. ഹോട്ടല്‍ ജീവനക്കാര്‍ക്ക് നേരെ ഡൊണാള്‍ഡ് വെടിയുതിര്‍ക്കുകയായിരുന്നു. ഒരാള്‍ തല്‍ക്ഷണം മരിച്ചു. രണ്ടാമത്തെയാളെ കത്തി കൊണ്ട് കുത്തി മരണം ഉറപ്പിക്കുകയായിരുന്നു. 

2005ലാണ് ഡൊണാള്‍ഡിനെ വധശിക്ഷയ്ക്ക് കോടതി വിധിച്ചത്. ശിക്ഷ ഒഴിവാക്കാൻ പല തവണ പ്രതി അപ്പീല്‍ നല്‍കി. ബുധനാഴ്ച ഡൊണാള്‍ഡിന്റെ അപ്പീല്‍ യുഎസ് സുപ്രീം കോടതി തള്ളി. അമേരിക്ക നടപ്പിലാക്കിയ ഈ വർഷത്തെ ആദ്യ വധശിക്ഷയാണ് ഡൊണാൾഡിന്റേത്.