എന്തിനാണ് കൊച്ചു കരയുന്നത് എന്ന് ചോദിച്ച് മനസ്സിലാക്കേണ്ടി വന്നു.

അവളുടെ പിങ്ക് നിറമുള്ള കാറ്റാടി മറ്റൊരു കൊച്ച്എടുത്തിരിക്കുന്നു.

വാക്കുകളില്ലാതെ, ആംഗ്യമെന്ന് പറയാവുന്ന ഭാഷയില്‍ അവള്‍ കണ്ണീരില്‍ മുങ്ങിയ നിവേദനം തന്നു. ഇനി രക്ഷയില്ല, ഇടപെട്ടേ പറ്റൂ.

ഇടപെട്ടതു കൊണ്ട് ഒരു പ്രയോജനം ഉണ്ടായി. 'The child is the father of the man', എന്ന ചൊല്ലിന്റെ അര്‍ത്ഥം മനസ്സിലായി.

സമയം കുറച്ച് കഴിഞ്ഞു. കാറ്റാടി എടുത്ത കൊച്ച് അതിനെ നിഷ്‌കരുണം ഉപേക്ഷിച്ചു. സുവര്‍ണ്ണാവസരം മനസ്സിലാക്കിയ ഞാന്‍, അതെടുത്ത് നിവേദനക്കാരിക്ക് കൊടുക്കാന്‍ ആഞ്ഞു നടന്നു.

എന്തതിശയം! അവള്‍ അത് വാങ്ങി ദൂരെയെറിഞ്ഞു. പകരം തന്നു, കവിളിലൊരു ചക്കരയുമ്മ.