അറക്കപ്പൊടി ചുമന്ന്

വന്നുപോയിരുന്ന ഒരാൾ

വീണുമാഞ്ഞതുപോലെ

ഭാരമേറിയ ചാക്കിനടിയിൽ

പതുങ്ങി ഒടിഞ്ഞ് മടങ്ങി

നിരാലംബമായി

അവലംബമില്ലാതായ നിഴലുകളിൽ

ഒളിച്ചുകളിച്ച വെളിച്ചവും മാഞ്ഞു.

മരിച്ചവരൊളിച്ചിരിക്കുന്ന തണുപ്പിൽ

പ്രത്യക്ഷവും പരോക്ഷവുമായി

നോക്കിയിരിക്കുന്നവർക്കിടയിൽ

ഒരു പ്രായമായി

പ്രമേയമോ പ്രമേഹമോ ആയി

വഴിയരികിലെ വിളക്കുകാലിൽ

പതിക്കപ്പെട്ട ചിത്രമോ

ഇരുൾക്കൊടിയോ ആയി

ഏതാനും നാൾ തങ്ങിനിന്നിട്ട്/

തൂങ്ങിനിന്നിട്ട്

പിൻവലിയുന്ന ആ ആൾ.

പരിചയത്തിനും അപരിചിതത്വത്തിനുമിടെ

മണ്ണിലേക്കോ തീയിലേക്കോ

ജലത്തിലേക്കോ ജയത്തിലേക്കോ

പൊയ്‌പ്പോയ ഒരാൾ.

മൂന്നക്ഷരം പോന്ന പോരിൽ/പേരിൽ

മരണമാ രണവീരനായി.