ന്യൂയോര്‍ക്ക്: ഗോളുകളടിച്ചും വഴിയൊരുക്കിയും അര്‍ജന്റീന ഇതിഹാസ താരം ലയണല്‍ മെസിയുടെ ഐതിഹാസിക ഫുട്‌ബോള്‍ യാത്ര തുടരുന്നു. ഫുട്‌ബോള്‍ ചരിത്രത്തില്‍ 1300 ഗോള്‍ പങ്കാളിത്തം നേടുന്ന ആദ്യ താരമെന്ന റെക്കോര്‍ഡും ആ യാത്രയില്‍ മെസി സ്വന്തമാക്കി. കരിയറില്‍ 896 ഗോളുകളും 404 അസിസ്റ്റുകളുമായാണ് മെസി മാജിക്ക് നമ്പറായ 1300ല്‍ എത്തിയത്.

മേജര്‍ ലീഗ് സോക്കറിന്റെ ഈസ്‌റ്റേണ്‍ കോണ്‍ഫറന്‍സ് സെമി ഫൈനലില്‍ സിന്‍സിനാറ്റിക്കെതിരായ പോരാട്ടത്തില്‍ ഇന്റര്‍ മയാമി 4-0ത്തിനു വിജയം സ്വന്തമാക്കിയപ്പോള്‍ കളി മൊത്തം നിര്‍ണയിച്ചത് മെസി. ചരിത്രത്തിലാദ്യമായി ഇന്റര്‍ മയാമി ഈസ്റ്റേണ്‍ കോണ്‍ഫറന്‍സ് ഫൈനലിലേക്ക് മുന്നേറിയപ്പോള്‍ അതില്‍ ഒരു ഗോളും 3 അസിസ്റ്റും മെസിയുടെ വക.

ചുരുക്കം പറഞ്ഞാല്‍ ഇന്റര്‍ മയാമി നേടിയ നാല് ഗോളിലും മെസിയുടെ പാദ സ്പര്‍ശമുണ്ട്. ശനിയാഴ്ച നടക്കുന്ന ഫൈനലില്‍ ന്യൂയോര്‍ക്ക് സിറ്റിയാണ് ഇന്റര്‍ മയാമിയുടെ എതിരാളികള്‍.

സിന്‍സിനാറ്റിക്കെതിരായ പോരാട്ടത്തിന്റെ 19ാം മിനിറ്റിലാണ് മെസിയുടെ ഗോള്‍. ഹെഡ്ഡറിലൂടെ വല ചലിപ്പിക്കുകയായിരുന്നു. 57ാം മിനിറ്റില്‍ മാറ്റിയോ സില്‍വെയും 62, 74 മിനിറ്റുകളില്‍ ടാഡിയോ അല്ലന്‍ഡെ ഇരട്ട ഗോളുകളും നേടിയാണ് പട്ടിക പൂര്‍ത്തിയാക്കിയത്. മൂന്ന് ഗോളിനും വഴിയൊരുക്കിയത് മെസിയും.