ദുബായ്: യൂത്ത് ഏകദിനത്തില്‍ ഇരട്ട സെഞ്ച്വറി നേടുന്ന ആദ്യ ഇന്ത്യന്‍ താരമെന്ന റെക്കോഡ് നേട്ടവുമായി ഇന്ത്യന്‍ അണ്ടര്‍ 19 താരം അഭിഗ്യാന്‍ കുണ്‍ഡു. വെറും 125 പന്തില്‍ 209* റണ്‍സ് നേടി പുറത്താകാതെനിന്ന കുണ്‍ഡുവിന്റെ തകര്‍പ്പന്‍ ഇന്നിങ്‌സിന്റെ ബലത്തില്‍ മലേഷ്യയ്ക്കെതിരെ ആദ്യം ബാറ്റു ചെയ്ത ഇന്ത്യ 7ന് 408 എന്ന കൂറ്റന്‍ റണ്‍സ് നേടി. ഒമ്പത് സിക്സും 17 ഫോറും അടങ്ങുന്നതായിരുന്നു താരത്തിന്റെ ഇന്നിങ്സ്.

ഇതോടൊപ്പം യൂത്ത് ഏകദിനത്തില്‍ ഒരു ഇന്ത്യന്‍ താരത്തിന്റെ ഏറ്റവും ഉയര്‍ന്ന സ്‌കോര്‍ എന്ന റെക്കോര്‍ഡും അഭിഗ്യാന്‍ സ്വന്തം പേരിലാക്കി. 14-കാരന്‍ വൈഭവ് സൂര്യവംശിയുടെ 171 റണ്‍സിന്റെ റെക്കോര്‍ഡാണ് അഭിഗ്യാന്‍ മറികടന്നത്. യുഎഇക്കെതിരായ മത്സരത്തിലായിരുന്നു വൈഭവിന്റെ റെക്കോര്‍ഡ് പ്രകടനം.

ദക്ഷിണാഫ്രിക്കക്കാരന്‍ ജോറിച്ച് വാന്‍ ഷാല്‍ക്വിക്കിന് ശേഷം യൂത്ത് ഏകദിനത്തില്‍ ഇരട്ട സെഞ്ചുറി നേടുന്ന രണ്ടാമത്തെ മാത്രം താരമാണ് അഭിഗ്യാന്‍. വാന്‍ ഷാല്‍ക്വിക്കിന്റെ 215-ന് ശേഷം അണ്ടര്‍ 19 ക്രിക്കറ്റിലെ ഏറ്റവും ഉയര്‍ന്ന രണ്ടാമത്തെ ഉയര്‍ന്ന സ്‌കോര്‍ എന്ന നേട്ടവും ഇന്ത്യന്‍ താരത്തിന് സ്വന്തമായി. അണ്ടര്‍ 19 ഏഷ്യാ കപ്പിലെ ഏറ്റവും ഉയര്‍ന്ന വ്യക്തിഗത സ്‌കോറും കൂടിയാണിത്.

ഇന്ത്യയ്ക്കായി വേദാന്ത് ത്രിവേദി (106 പന്തില്‍ 90), വൈഭവ് സൂര്യവംശി (26 പന്തില്‍ 50) എന്നിവര്‍ അര്‍ധസെഞ്ച്വറി നേടി വൈഭവ് പുറത്തായതിനു പിന്നാലെ ക്രീസിലെത്തിയ അഭിഗ്യാന്‍ 44 പന്തില്‍ നിന്നാണ് അര്‍ധ സെഞ്ച്വറിയിലെത്തിയത്. പിന്നീട് 80-ാം പന്തില്‍ സെഞ്ച്വറിയിലെത്തി. 121 പന്തിലായിരുന്നു ഇരട്ട സെഞ്ചുറി. വേദാന്ത് ത്രിവേദിയുമായി ചേര്‍ന്ന് 181 പന്തില്‍ 209 റണ്‍സും, കനിഷ്‌ക് ചൗഹാനുമായി ചേര്‍ന്ന് 36 പന്തില്‍ നിന്ന് 87 റണ്‍സും അഭിഗ്യാന്‍ കൂട്ടിച്ചേര്‍ത്തു.