അഹമ്മദാബാദ്: വര്‍ത്തമാന ക്രിക്കറ്റിലെ ഏറ്റവും മികച്ച ബാറ്റ്‌സ്മാനാണ് ഇന്ത്യന്‍ ക്യാപ്റ്റന്‍ വിരാട് കോഹ്‌ലി. ക്രിക്കറ്റിലെ അപൂര്‍വ റെക്കോര്‍ഡുകള്‍ക്കും ഉടമയായ കോഹ്‌ലി ഇംഗ്ലണ്ടിനെതിരായ ടി20 പരമ്പരയിലെ രണ്ടാം പോരാട്ടത്തില്‍ ടീമിനെ വിജയത്തിലേക്ക് നയിക്കുന്നതില്‍ നിര്‍ണായക പങ്ക് വഹിച്ചത് കോഹ്‌ലിയുടെ ഇന്നിങ്‌സാണ്. 

മത്സരത്തില്‍ അര്‍ധ സെഞ്ച്വറി നേടിയ കോഹ്‌ലി അന്താരാഷ്ട്ര ടി20യില്‍ 3,000 റണ്‍സ് തികയ്ക്കുന്ന ആദ്യ പുരുഷ ക്രിക്കറ്റ് താരമെന്ന റെക്കോര്‍ഡ് സ്വന്തമാക്കി. വനിതാ ക്രിക്കറ്റില്‍ ന്യൂസിലന്‍ഡിന്റെ സുസി ബെയ്റ്റ്‌സ് (3301), സ്റ്റഫാനി ടെയ്‌ലര്‍ (3062) എന്നിവര്‍ നേരത്തെ നേട്ടം സ്വന്തമാക്കിയവരാണ്.

ഇംഗ്ലണ്ടിനെതിരായ രണ്ടാം ടി20യില്‍ 49 പന്തില്‍ 73 റണ്‍സുമായാണ് കോഹ്‌ലി തിളങ്ങിയത്. അഞ്ച് ഫോറും മൂന്ന് സിക്‌സും സഹിതമാണ് കോഹ്‌ലിയുടെ മികച്ച ഇന്നിങ്‌സ്. 87 മത്സരങ്ങളില്‍ നിന്ന് കോഹ്‌ലിയുടെ സമ്പാദ്യം ഇതോടെ 3001 ആയി. 2010ല്‍ സിംബാബ്‌വെക്കെതിരെയാണ് കോഹ്‌ലി അരങ്ങേറിയത്. 

ഇംഗ്ലണ്ടിനെതിരായ പോരാട്ടത്തില്‍ ആദ്യ ടി20യില്‍ തോറ്റ ഇന്ത്യ രണ്ടാം മത്സരം വിജയിച്ച് അഞ്ച് മത്സരങ്ങളടങ്ങിയ പരമ്പര 1-1 എന്ന നിലയില്‍ എത്തിച്ചു. മൂന്നാം ടി20 പോരാട്ടം നാളെ നടക്കും.