നഗോയ: ഏഷ്യന്‍ ഗെയിംസ് അത്‌ലറ്റിക്‌സ് വനിതകളുടെ 10,000 മീറ്ററില്‍ ഇന്ത്യക്ക് വെങ്കലം. ഇന്ത്യയുടെ സീമ കുമാരിയാണ് മെഡല്‍ നേടിയത്. 32: 50: 05 സമയത്തിലാണ് താരം ഫിനിഷ് ചെയ്തത്.

വനിതകളുടെ 10,000 മീറ്ററില്‍ ഒരു മെഡല്‍ എന്ന ഇന്ത്യയുടെ 16 വര്‍ഷത്തെ കാത്തിരിപ്പിനാണ് സീമ വിരാമമിട്ടത്. 2010ല്‍ മലയാളിയായ പ്രീജ ശ്രീധരന്‍ ഈ ഇനത്തില്‍ ഇന്ത്യക്കായി സ്വര്‍ണം നേടിയിട്ടുണ്ട്. അന്ന് ഇതേ ഇനത്തില്‍ വെള്ളിയും ഇന്ത്യയ്ക്കു തന്നെയായിരുന്നു. കവിത റാവത്താണ് വെള്ളി നേടിയത്. അതിനു ശേഷം ഇപ്പോഴാണ് ഈ ഇനത്തില്‍ ഇന്ത്യയുടെ മുന്നേറ്റം.

ഇന്ന് ഇന്ത്യ നേടുന്ന മൂന്നാം മെഡലാണിത്. നേരത്തെ വുഷുവില്‍ ഇന്ത്യന്‍ താരം റോഷിബിന ദേവി് വെള്ളി മെഡല്‍ നേടിയിരുന്നു. ഫൈനലില്‍ ചൈനയുടെ ഴാങ് സിയൂവിനോട് ഇന്ത്യയുടെ റോഷിബിന പരാജയപ്പെടുകയായിരുന്നു. തുഴച്ചിലില്‍ ഇന്ത്യയ്ക്ക് വെങ്കലവും ലഭിച്ചിട്ടുണ്ട്.

വുഷു വനിതാ വിഭാഗം 60 കിലോഗ്രാം വിഭാഗത്തില്‍ കടുത്ത പോരാട്ടത്തിനൊടുവിലാണ് രോഷിബിന പരാജയം സമ്മതിച്ചത്. ഏഷ്യന്‍ ഗെയിംസില്‍ വുഷുവില്‍ റോഷിബിനയുടെ ഹാട്രിക് മെഡല്‍ നേട്ടമാണിത്. 2018 ഏഷ്യന്‍ ഗെയിംസില്‍ വെങ്കലവും, 2022 ല്‍ വെള്ളിയും നേടിയിരുന്നു.

തുഴച്ചിലില്‍ ഇന്ത്യയുടെ സല്‍മാന്‍ ഖാന്‍- സത്നം സിങ് സഖ്യമാണ് വെങ്കലം നേടിയത്. പുരുഷ വിഭാഗം ഡബിള്‍ സ്‌കള്‍സിലാണ് ഇന്ത്യന്‍ ജോഡി മെഡല്‍ നേടിയത്. തുഴച്ചില്‍ മത്സരങ്ങളില്‍ ഇന്ത്യയുടെ ആദ്യ മെഡല്‍ നേട്ടമാണിത്. മെഡല്‍ വേട്ടയില്‍ ചൈനയാണ് ഒന്നാമത്. ഒരു സ്വര്‍ണം അടക്കം 14 മെഡലുകളാണ് നിലവില്‍ ഇന്ത്യക്കുള്ളത്.