മുംബൈ: ഓസ്ട്രേലിയക്കെതിരായ ടെസ്റ്റ് മത്സരത്തിനുള്ള ഇന്ത്യൻ വനിതാ ക്രിക്കറ്റ് ടീമിനെ ബി സി സി ഐ പ്രഖ്യാപിച്ചു. ഹർമൻപ്രീത് കൗർ ഇന്ത്യൻ ടീമിനെ നയിക്കും. സ്മൃതി മന്ധാനയാണ് വൈസ് ക്യാപ്റ്റൻ. മാർച്ച് 6 മുതൽ 9 വരെ പെർത്ത് സ്റ്റേഡിയത്തിലാണ് ഇന്ത്യ–ഓസ്ട്രേലിയ ടെസ്റ്റ് മത്സരം നടക്കുക. ഇതോടൊപ്പം റൈസിങ് സ്റ്റാർസ് ഏഷ്യ കപ്പിനുള്ള ഇന്ത്യൻ ടീമിനെയും സെലക്ഷൻ കമ്മിറ്റി പ്രഖ്യാപിച്ചിട്ടുണ്ട്.

ഫെബ്രുവരി 15ന് ആരംഭിക്കുന്ന ടി20 മത്സരങ്ങളോടെയാണ് ഓസ്ട്രേലിയൻ പരമ്പര ആരംഭിക്കുന്നത്. 3 വീതം ടി20,ഏകദിന മത്സരങ്ങളും ഒരു ടെസ്റ്റ് മത്സരവുമാണ് പരമ്പരയിൽ ഉള്ളത്. വരാനിരിക്കുന്ന വനിതാ ടി20 ലോകകപ്പ് മത്സരങ്ങൾക്ക് മുന്നോടിയായി നടക്കുന്ന ഈ പരമ്പര ഇന്ത്യൻ വനിതാ ടീമിന്റെ കരുത്ത് വിലയിരുത്താനുള്ള അവസരം കൂടിയാണ്.

ടെസ്റ്റ് ടീം അംഗങ്ങൾ: ഹർമൻപ്രീത് കൗർ (ക്യാപ്റ്റൻ), സ്മൃതി മന്ധാന (വൈസ് ക്യാപ്റ്റൻ), ഷഫാലി വർമ്മ, ജെമീമ റോഡ്രിഗസ്, അമൻജോത് കൗർ, റിച്ചാ ഘോഷ് (വിക്കറ്റ് കീപ്പർ), ഉമാ ഛേത്രി (വിക്കറ്റ് കീപ്പർ), പ്രതിക റാവൽ, ഹർലീൻ ഡിയോൾ, ദീപ്തി ശർമ, രേണുക സിംഗ് ഠാക്കൂർ, സ്നേഹ റാണ, ക്രാന്തി ഗൗഡ്, വൈഷ്ണവി ശർമ, സയാലി സത്ഘരെ.