സതാംപ്ടൺ: ലോക ടെസ്റ്റ് ചാമ്പ്യൻഷിപ്പ് ഫൈനലിനായുള്ള കാത്തിരിപ്പിലാണ് ക്രിക്കറ്റ് ലോകം. ന്യൂസിലാൻഡിനെതിരായ കൊമ്പുകോർക്കലിന് മുൻപായി പരിശീലനം നടത്തുകയാണ് ഇന്ത്യൻ സംഘം ഇപ്പോൾ. പരിശീലനത്തിന്റെ ഭാ​ഗമായുള്ള ഇൻട്രാ സ്ക്വാഡ് മാച്ചിലെ നിമിഷങ്ങളുമായി വീഡിയോ പങ്കുവെച്ചിരിക്കുകയാണ് ബിസിസിഐ. 

അവിടെ ഇന്ത്യൻ വിക്കറ്റ് കീപ്പർ ബാറ്റ്സ്മാൻ ഋഷഭ് പന്തിന്റെ സിക്സ് ആണ് ആരാധകരെ ത്രില്ലടിപ്പിക്കുന്നത്. ട്രാക്കിന് പുറത്തേക്ക് ഇറങ്ങി സ്ട്രെയ്റ്റ് സിക്സ് ആണ് ഇവിടെ പന്തിന്റെ ബാറ്റിൽ നിന്ന് വരുന്നത്. ബാറ്റ് ഉയർത്തി പന്ത് ക്രീസിൽ നിന്ന് മടങ്ങുന്നിടത്ത് ഒരു മിനിറ്റ് ദൈർഘ്യമുള്ള വീഡിയോ അവസാനിക്കുന്നു. 

ഇൻട്രാ സ്ക്വാഡ് മാച്ചിന്റെ സ്കോർ ബോർഡ് ബിസിസിഐ പങ്കുവെച്ചിട്ടില്ല. എന്നാൽ പന്ത് അവിടെ മിന്നിയിട്ടുണ്ടാവും എന്നാണ് വീഡിയോയിൽ നിന്ന് വ്യക്തമാവുന്നത്. നാല് ദിവസം നീണ്ട ഇൻട്രാ സ്ക്വാഡ് മാച്ചിന്റെ ആദ്യ ദിനത്തിലെ വീഡിയോയാണ് ബിസിസിഐ ആരാധകരുടെ മുൻപിലേക്ക് വെച്ചത്. ജൂൺ 18നാണ് ലോക ടെസ്റ്റ് ചാമ്പ്യൻഷിപ്പ് ഫൈനലിൽ കിവീസിനെ ഇന്ത്യ നേരിടുന്നത്.