കൊളംബോ: ശ്രീലങ്കക്കെതിരായ രണ്ടാം ഏകദിനത്തില്‍ ഭുവനേശ്വര്‍ കുമാറില്‍ നിന്ന് വന്ന നോബോളിന് പിന്നിലെ കണക്കാണ് ക്രിക്കറ്റ് ലോകത്തെ അമ്പരപ്പിക്കുന്നത്. അഞ്ച് വര്‍ഷത്തിന് ശേഷമാണ് ഏകദിനത്തില്‍ ഭുവിയുടെ ആ നോബോള്‍ എത്തിയത്. 

ശ്രീലങ്കന്‍ ഇന്നിങ്‌സിന്റെ അഞ്ചാം ഓവറിലായിരുന്നു ഭുവിയുടെ നോബോള്‍. 3093 ഡെലിവറികള്‍ക്ക് ശേഷമാണ് ഏകദിനത്തില്‍ ഭുവിയുടെ നോബോള്‍ വന്നത്. 2015 ഒക്ടോബറിലാണ് ഭുവി ഇതിന് മുന്‍പ് ഏകദിനത്തില്‍ നോബോള്‍ എറിഞ്ഞത്. 

ഇവിടെ ഭുവിയുടെ സ്ഥിരതയെ പ്രശംസിക്കുകയാണ് ആരാധകര്‍. ശ്രീലങ്കക്കെതിരെ രണ്ടാം ഏകദിനത്തില്‍ ഭുവി മൂന്ന് വിക്കറ്റ് വീഴ്ത്തി. 10 ഓവറില്‍ 54 റണ്‍സ് വഴങ്ങിയാണ് ഭുവിയുടെ മൂന്ന് വിക്കറ്റ് നേട്ടം. എന്നാല്‍ പരമ്പരയിലെ ആദ്യ ഏകദിനത്തില്‍ ഭുവി നിരാശപ്പെടുത്തി. 9 ഓവറില്‍ 63 റണ്‍സ് ഇവിടെ വഴങ്ങിയ ഭുവിക്ക് വിക്കറ്റ് വീഴ്ത്താനും കഴിഞ്ഞില്ല.