ലീഡ്‌സ്: ഇംഗ്ലണ്ടിനെതിരായ ആദ്യ ടെസ്റ്റില്‍ സെഞ്ച്വറി തിളക്കവുമായി റെക്കോര്‍ഡിട്ട് ഋഷഭ് പന്ത്. മത്സരത്തില്‍ രണ്ട് ഇന്നിങ്‌സുകളിലും സെഞ്ച്വറി നേടിയ പന്ത് ഇന്ത്യന്‍ ഇന്നിങ്‌സിന് കരുത്ത് പകര്‍ന്നു. ടെസ്റ്റില്‍ തന്റെ എട്ടാം സെഞ്ച്വറി നേടിയ പന്ത് വിക്കറ്റ് കീപ്പറെന്ന നിലയില്‍ പുതിയ റെക്കോര്‍ഡും സ്വന്തമാക്കി.

ഒരു ടെസ്റ്റ് മത്സരത്തിലെ രണ്ട് ഇന്നിങ്സുകളിലും സെഞ്ച്വറി നേടുന്ന ആദ്യത്തെ ഇന്ത്യന്‍ വിക്കറ്റ് കീപ്പറെന്ന റെക്കോര്‍ഡാണ് പന്ത് സ്വന്തമാക്കിയത്. ആദ്യ ഇന്നിങ്സില്‍ 134 റണ്‍സ് നേടിയ പന്ത് രണ്ടാം ഇന്നിങ്‌സില്‍ 140 പന്തില്‍ 118 റണ്‍സെടുത്താണ് പന്ത് പുറത്തായത്. ഈ നേട്ടത്തോടെ, ഇംഗ്ലണ്ടില്‍ തുടര്‍ച്ചയായി അഞ്ച് 50+ സ്‌കോറുകള്‍ നേടുന്ന സന്ദര്‍ശക ബാറ്റര്‍മാരുടെ പട്ടികയിലും പന്ത് ഇടം നേടി.

ഡോണ്‍ ബ്രാഡ്മാന്‍, ഹാന്‍സി ക്രോണ്‍ജെ, ശിവ്നരൈന്‍ ചന്ദര്‍പോള്‍, കുമാര്‍ സംഗക്കാര, ഡാരില്‍ മിച്ചല്‍ തുടങ്ങിയവരാണ് പട്ടികയിലഒള്ളത്. ഏഴ് തവണ അമ്പതിലധികം സ്‌കോറുകള്‍ നേടിയ ഓസ്ട്രേലിയയുടെ സ്റ്റീവന്‍ സ്മിത്താണ് ഈ റെക്കോര്‍ഡില്‍ മുന്നില്‍. ഒരു ടെസ്റ്റ് മത്സരത്തിലെ രണ്ട് ഇന്നിങ്സുകളിലും സെഞ്ച്വറി നേടിയിട്ടുള്ളത് രണ്ട് വിക്കറ്റ് കീപ്പര്‍മാര്‍ മാത്രമാണ്. ആന്‍ഡി ഫ്‌ലവര്‍ (142, 199* ദക്ഷിണാഫ്രിക്ക, ഹരാരെ 2001), പന്ത് (134,118 ഇംഗ്ലണ്ട്, ഹെഡിംഗ്ലി 2025).

പന്ത് തുടര്‍ച്ചയായ സെഞ്ച്വറികളോടെ ഈ എലൈറ്റ് ക്ലബ്ബില്‍ ചേര്‍ന്നു, അപൂര്‍വ നേട്ടം കൈവരിക്കുന്ന ആദ്യ ഇന്ത്യന്‍ വിക്കറ്റ് കീപ്പറായി. ഒരു ടെസ്റ്റ് മത്സരത്തിലെ രണ്ട് ഇന്നിങ്‌സുകളിലും സെഞ്ച്വറി നേടിയിട്ടുള്ള ഇന്ത്യന്‍ ബാറ്റര്‍മാര്‍- വിജയ് ഹസാരെ, സുനില്‍ ഗവാസ്‌കര്‍ (മൂന്ന് തവണ), രാഹുല്‍ ദ്രാവിഡ് (രണ്ട് തവണ), വിരാട് കോഹ്ലി, അജിങ്ക്യ രഹാനെ, രോഹിത് ശര്‍മ, ഋഷഭ് പന്ത്.