ഹൊബാര്‍ട്ട്: വനിതാ ബിഗ് ബാഷ് ലീഗ് ചരിത്രത്തില്‍ ആദ്യമായി കിരീടം സ്വന്തമാക്കി ഹൊബാര്‍ട്ട് ഹരിക്കെയ്ന്‍സ്. ഫൈനലില്‍ പെര്‍ത്ത് സ്‌കോച്ചേഴ്‌സിനെ വീഴ്ത്തിയാണ് കന്നി കിരീടം സ്വന്തമാക്കിയത്. 8 വിക്കറ്റ് വിജയമാണ് ഫൈനലില്‍ ഹൊബാര്‍ട്ട് ഹരിക്കെയ്ന്‍സ് നേടിയത്.

ഫൈനലില്‍ ആദ്യം ബാറ്റ് പെര്‍ത്ത് നിശ്ചിത ഓവറില്‍ 5 വിക്കറ്റ് നഷ്ടത്തില്‍ 137 റണ്‍സാണ് കണ്ടെത്തിയത്. ഹൊബാര്‍ട്ട് ഹരിക്കെയ്ന്‍സ് 15 ഓവറില്‍ 2 വിക്കറ്റ് മാത്രം നഷ്ടത്തില്‍ 141 റണ്‍സ് അടിച്ചാണ് വിജയവും കന്നി കിരീടവും പിടിച്ചെടുത്തത്.

ദക്ഷിണാഫ്രിക്കന്‍ താരവും ഈ വര്‍ഷത്തെ വനിതാ പ്രീമിയര്‍ ലീഗില്‍ ഡല്‍ഹി ക്യാപിറ്റല്‍സ് ടീമിലെത്തിച്ച താരവുമായ ലിസല്‍ ലീയുടെ വെടിക്കെട്ട് ബാറ്റിങാണ് ഹൊബാര്‍ട്ടിനു ജയമൊരുക്കിയത്. താരം 4 സിക്‌സും 10 ഫോറും സഹിതം 44 പന്തില്‍ 77 റണ്‍സുമായി പുറത്താകാതെ നിന്നു.

വനിതാ പ്രീമിയർ ലീ​ഗിൽ ഇത്തവണ ഡൽഹി ക്യാപിറ്റൽസ് സ്വന്തമാക്കിയ താരം കൂടിയാണ് ലീ​. അടിസ്ഥാന വിലയായ 30 ലക്ഷം രൂപയ്ക്കാണ് വനിതാ ക്രിക്കറ്റിലെ ഹാർഡ് ഹിറ്റർമാരിൽ ഒരാൾ കൂടിയായ ലിസൽ ലീയെ ഡൽ​ഹി സ്വന്തമാക്കിയത്.

ഫൈനലിലെ മികച്ച പ്രകടനത്തോടെ താരം വനിതാ ബി​ഗ് ബാഷ് ലീ​ഗിൽ പുതിയെ ചരിത്രവും എഴുതി. ഡബ്ല്യുബിബിഎൽ ഫൈനലിൽ ഏറ്റവും ഉയർന്ന വ്യക്തി​ഗത സ്കോർ നേടുന്ന താരമായി ലിസൽ ലീ മാറി.

27 പന്തില്‍ 35 റണ്‍സെടുത്ത നാറ്റ് സീവര്‍ ബ്രാന്‍ഡ് ലീയ്ക്ക് മികച്ച പിന്തുണ നല്‍കിയതോടെ അവര്‍ അതിവേഗമാണ് ജയം തൊട്ടത്. ഡാനി വ്യാറ്റാണ് (16) പുറത്തായ മറ്റൊരു താരം. കളി അവസാനിക്കുമ്പോള്‍ ലീയ്‌ക്കൊപ്പം 6 റണ്‍സുമായി നിക്കോള കാരിയായിരുന്നു ക്രീസില്‍.

നേരത്തെ ക്യാപ്റ്റന്‍ സോഫി ഡിവൈന്‍ (34), ബെത് മൂണി (33), പെയ്ജ് സ്‌കോള്‍ഫീല്‍ഡ് (27) എന്നിവരുടെ ബാറ്റിങാണ് പെര്‍ത്തിനു പൊരുതാവുന്ന സ്‌കോര്‍ സമ്മാനിച്ചത്.