ഹാംബര്‍ഗ്: യൂറോ കപ്പില്‍ ചെക്ക് റിപ്പബ്ലിക്കിനെ സമനിലയില്‍ തളച്ച് ജോര്‍ജിയ. ടൂര്‍ണമെന്റിലെ ഏറ്റവും താഴെ റാങ്കിലുള്ള ജോര്‍ജിയ 1-1നാണ് സമനില പിടിച്ചത്. ജോര്‍ജസ് മികൗതസെയാണ് പെനാല്‍റ്റിയിലൂടെ വല ചലിപ്പിച്ചത്. പാട്രിക്ക് ഷീകാണ് ചെക്കിനെ രണ്ടാം പകുതിയില്‍ ഒപ്പമെത്തിച്ചത്.

അതേസമയം ചരിത്ര വിജയം സ്വന്തമാക്കാനുള്ള സുവര്‍ണാവസരം ജോര്‍ജിയ കളഞ്ഞു കുളിച്ചു. അവസാന നിമിഷങ്ങളില്‍ നടത്തിയ കൗണ്ടര്‍ അറ്റാക്കില്‍ ഒഴിഞ്ഞ പോസ്റ്റിലേക്ക് ഗോളടിക്കാനുള്ള ഗോള്‍ഡന്‍ ചാന്‍സ് മികൗതസെയ്ക്കു തന്നെ ലഭിച്ചു. എന്നാല്‍ താരത്തിന്റെ ഷോട്ട് ബാറിനു മുകളിലൂടെ പോയത് അവരുടെ നിര്‍ഭാഗ്യമായി. താരം നായകനും വില്ലനുമായി.

കളിയിലുടനീളം കടുത്ത ആക്രമണമാണ് ചെക്ക് പുറത്തെടുത്തത്. 27 ഗോള്‍ ശ്രമങ്ങള്‍. അതില്‍ 12 ടാര്‍ഗറ്റുകള്‍. മറുഭാഗത്ത് ജോര്‍ജിയ അഞ്ച് തവണയാണ് ഗോളടിക്കാന്‍ ശ്രമിച്ചത്. ലക്ഷ്യത്തിലേക്ക് തൊടുത്തത് ഒറ്റ ഷോട്ട്.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

കളി ആദ്യ പകുതിക്ക് പിരിയുന്നതിനു തൊട്ടുമുന്‍പ് ലീഡെടുത്ത ജോര്‍ജിയ രണ്ടാം പകുതിയില്‍ ഗോള്‍ വഴങ്ങി. പിന്നീട് ചെക്കിനെ ഗോളടിക്കാന്‍ അനുവദിക്കാതെ പ്രതിരോധിച്ചു.

ബോക്‌സില്‍ വച്ച് പന്ത് ചെക്ക് താരം റോബിന്‍ ഹരനാക്കിന്റെ കൈയില്‍ പന്ത് തട്ടിയതിനാണ് ജോര്‍ജിയക്ക് പെനാല്‍റ്റി ലഭിച്ചത്. വാര്‍ പരിശോധിച്ചാണ് പെനാല്‍റ്റി. പന്ത് മികൗതസെ സുരക്ഷിതമായി വലയിലാക്കി.

രണ്ടാം പകുതിയില്‍ കോര്‍ണറില്‍ നിന്നു വന്ന പന്ത് പോസ്റ്റില്‍ തട്ടി ഷീക്കിന്റെ നെഞ്ചില്‍ തട്ടി വലയില്‍ കയറുകയായിരുന്നു. എന്നാല്‍ പിന്നീട് ജയത്തിനായി ചെക്ക് ശ്രമിച്ചെങ്കിലും നടന്നില്ല. 59ാം മിനിറ്റിലാണ് ചെക്ക് സമനില പിടിച്ചത്.