മ്യൂണിക്ക്: സ്വന്തം തട്ടകമായ അലിയന്‍സ് അരീനയില്‍ രാജകീയ വിജയവുമായി പുതിയ ബുണ്ടസ് ലീഗ സീസണിന് മിന്നും തുടക്കമിട്ട് നിലവിലെ ചാംപ്യന്‍മാരായ ബയേണ്‍ മ്യൂണിക്ക്. മറുപടിയില്ലാത്ത ആറ് ഗോളുകള്‍ക്ക് ആര്‍ബി ലെയ്പ്‌സിഗിനെ നിലംപരിശാക്കിയാണ് സീസണിന് അവര്‍ വിജയത്തുടക്കമിട്ടത്.

ഇംഗ്ലീഷ് നായകന്‍ ഹാരി കെയ്ന്‍ നേടിയ ഹാട്രിക്ക് ഗോളുകളും ഫ്രഞ്ച് വിസ്മയം മൈക്കല്‍ ഒലീസെ നേടിയ ഇരട്ട ഗോളുകളും ഒപ്പം ലിവര്‍പൂളില്‍ നിന്നു ഇത്തവണ ബയേണ്‍ സ്വന്തമാക്കിയ ലൂയീസ് ഡിയാസിന്റെ കന്നി ബുണ്ടസ് ലീഗ ഗോളും ബാവേറിയന്‍ സംഘത്തിന്റെ ജയം നിര്‍ണയിച്ചു. കളിയുടെ 27ാം മിനിറ്റില്‍ ഒലീസെയാണ് ഗോള്‍ വേട്ട തുടങ്ങിയത്. പിന്നാലെ 32ാം മിനിറ്റില്‍ ഡിയാസും വല ചലിപ്പിച്ചു. ആദ്യ പകുതി തീരാന്‍ മിനിറ്റുകള്‍ മാത്രമുള്ളപ്പോള്‍ ഒലീസെ തന്റെ രണ്ടാം ഗോളും ടീമിന്റെ മൂന്നാം ഗോളും വലയിലിട്ടു.

രണ്ടാം പകുതിയിലാണ് ഹാരി കെയ്ന്‍ ഹാട്രിക്ക്. 64, 74, 77 മിനിറ്റുകളിലായിരുന്നു ഗോളുകള്‍. ഒരു ​ഗോൾ നേടിയ ഡിയാസ് രണ്ട് ​ഗോളുകൾക്ക് വഴിയൊരുക്കിയും ബുണ്ടസ് ലീ​ഗ അരങ്ങേറ്റം ​ഗംഭീരമാക്കി.

ആദ്യ പകുതിയെ അപേക്ഷിച്ച് ലെയ്പ്‌സിഗ് രണ്ടാം പകുതിയില്‍ മെച്ചപ്പെട്ട പ്രകടനം പുറത്തെടുത്തു. എന്നാല്‍ 60 മിനിറ്റുകള്‍ക്കു ശേഷം കളി വീണ്ടും അവരുടെ കൈയില്‍ നിന്നു പോയി. രണ്ടാം പകുതിയില്‍ അവര്‍ ഒരു ഗോള്‍ മടക്കിയെങ്കിലും വിഎആര്‍ പരിശോധനയില്‍ ഈ ഗോള്‍ അനുവദിച്ചില്ല. അതോടെ ആ പ്രതീക്ഷയും അവസാനിച്ചു.