അറ്റ്ലാന്റ: ഫിഫ ലോകകപ്പ് പ്രീക്വാര്‍ട്ടറില്‍ അര്‍ജന്റീനയെ ഞെട്ടിച്ച് ഈജിപ്തിന്റെ പ്രഹരം. പതിനഞ്ചാം മിനിറ്റില്‍ അര്‍ജന്റീനയെ വിറപ്പിച്ച് ഈജിപ്ത് ആദ്യ ഗോള്‍ നേടി. യാസര്‍ ഇബ്രാഹിമാണ് മനോഹരമായ ഹെഡറിലൂടെ അര്‍ജന്റീനയുടെ വല കുലുക്കിയത്. ബോക്‌സിന് പുറത്തുനിന്നു മര്‍വാന്‍ അറ്റിയ നല്‍കിയ പന്ത് പോസ്റ്റിന് തൊട്ടുമുന്നില്‍ നിന്നു യാസര്‍ ഹെഡ് ചെയ്ത് വലയിലാക്കുകയായിരുന്നു.

അതേസമയം, അര്‍ജന്റീനയ്ക്ക് ലഭിച്ച രണ്ടു മികച്ച അവസരങ്ങള്‍ പാഴായി. മത്സരത്തിന്റെ ഏഴാം മിനിറ്റില്‍ ഈജിപ്ത് പോസ്റ്റ് ലക്ഷ്യമാക്കി എന്‍സോ ഫെര്‍ണാണ്ടസ് പോസ്റ്റിന് തൊട്ടുമുന്നില്‍ നിന്ന് തൊടുത്ത ഷോട്ട് നേരിയ വ്യത്യാസത്തിലാണ് പുറത്തുപോയത്. 21-ാം മിനിറ്റില്‍ അര്‍ജന്റീനയ്ക്ക് അനുകൂലമായി ലഭിച്ച പെനല്‍റ്റി മെസി പാഴാക്കി. ഈ ലോകകപ്പില്‍ ഇതു രണ്ടാം തവണയാണ് മെസി പെനല്‍റ്റി നഷ്ടമാക്കുന്നത്. നേരത്തെ, ഓസ്ട്രിയയ്ക്കെതിരെ നടന്ന മത്സരത്തിലും മെസി പെനല്‍റ്റി കിക്ക് നഷ്ടമാക്കിയിരുന്നു.