ന്യൂയോര്‍ക്ക്: ലോകകപ്പില്‍ ഈജിപ്ത്- അര്‍ജന്റീന മത്സരത്തിലെ റഫറിയിങ്ങിനെതിരെ വിവിധ തരത്തിലുള്ള പ്രതികരണങ്ങള്‍ തുടരുകയാണ്. ഇതിനിടെ ആദ്യ ക്വാര്‍ട്ടര്‍ ഫൈനലിലെ റഫറിമാരുടെ പട്ടികയും വിവാദത്തിലേക്ക്. ഇന്ത്യന്‍ സമയം വെള്ളിയാഴ്ച പുലര്‍ച്ചെ നടക്കുന്ന ഫ്രാന്‍സ് - മൊറോക്കോ ക്വാര്‍ട്ടര്‍ മത്സരം നിയന്ത്രിക്കാനുള്ള റഫറിയിങ് പാനലില്‍ മുഴുവന്‍ അര്‍ജന്റീനക്കാരെയാണ് ഫിഫ ഉള്‍പ്പെടുത്തിയിരിക്കുന്നത്.

ഫിഫയുടെ ഔദ്യോഗിക പ്രഖ്യാപനം വന്നതിനു പിന്നാലെ വീണ്ടും ഒത്തുകളി ആരോപണങ്ങളും ശക്തമായിട്ടുണ്ട്. ഈ ലോകകപ്പില്‍ ഇതാദ്യമായാണ് ഒരു മത്സരത്തിലെ അഞ്ചു റഫറിമാരും ഒരേ രാജ്യത്ത് നിന്നുള്ളവരാകുന്നത്. പരിചയസമ്പന്നനായ ഫകുണ്ടോ ടെല്ലോ ആണ് ഈ മത്സരം നിയന്ത്രിക്കുന്നത്. ടെല്ലോയെ സഹായിക്കാന്‍ അസിസ്റ്റന്റ് റഫറിമാരായി യുവാന്‍ പാബ്ലോ ബെലാറ്റിയും ഗബ്രിയേല്‍ ചാഡെയും ഉണ്ടാകും.

നാലാം റഫറിയായി ഡാരിയോ ഹെരേരയും, ക്രിസ്റ്റ്യന്‍ നവാരോ റിസര്‍വ് അസിസ്റ്റന്റ് റഫറിയായും പ്രവര്‍ത്തിക്കുമെന്നാണ് ഫിഫ അറിയിച്ചിരിക്കുന്നത്. 2022-ലെ ഖത്തര്‍ ലോകകപ്പില്‍ മൊറോക്കോ പോര്‍ച്ചുഗലിനെ തോല്‍പ്പിച്ച ക്വാര്‍ട്ടര്‍ ഫൈനല്‍ മത്സരം നിയന്ത്രിച്ചത് ഫകുണ്ടോ ടെല്ലോ ആണ്. കഴിഞ്ഞ രണ്ട് ലോകകപ്പുകളിലും ഫ്രാന്‍സ്, അര്‍ജന്റീനയുടെ കടുത്ത എതിരാളികളായിരുന്നു. ഈ സാഹചര്യത്തില്‍ റഫറിമാരെ നിശ്ചയിച്ചത് മത്സരത്തിന്റെ നിക്ഷ്പക്ഷതയെക്കുറിച്ചുള്ള ചര്‍ച്ചയ്ക്ക് വഴിതെളിച്ചിരിക്കുകയാണ്.