ഗുവാഹത്തി: അന്തരിച്ച ഫുട്​ബാൾ ഇതിഹാസം ഡീഗോ മറഡോണയുടെ മോഷണം പോയ ആഡംബര വാച്ച് ​അസമിൽ കണ്ടെത്തി​. രഹസ്യ വിവരത്തിൻറെ അടിസ്​ഥാനത്തിൽ ശിവസാഗറിലെ വാസിദ്​ ഹുസൈൻ എന്നയാളുടെ വീട്ടിൽ നടത്തിയ തിരച്ചിലിലാണ് വാച്ച് കണ്ടെടുത്തത്. മുഖ്യപ്രതിയായ ഇയാളെ അറസ്റ്റ് ചെയ്തു. 

ദുബായ് പൊലീസിൽനിന്ന്​ ​കേന്ദ്ര ഏജൻസിക്ക്​ ലഭിച്ച വിവരത്തിൻറെ അടിസ്​ഥാനത്തിലായിരുന്നു പൊലീസിൻറ തിരച്ചിൽ. മറഡോണ ഉപയോഗിച്ചിരുന്ന സാധനങ്ങൾ സൂക്ഷിച്ചിരുന്ന ദുബായിലെ കമ്പനിയിലെ സുരക്ഷാ ജീവനക്കാരിൽ ഒരാളായിരുന്നു വാസിദ്​. കുറച്ച് ദിവസം ജോലി ചെയ്ത ശേഷം അച്ഛന് സുഖമില്ലെന്ന് പറഞ്ഞ് ഇക്കഴിഞ്ഞ ഓഗസ്റ്റിൽ അവധിയെടുത്ത് ഇയാൾ അസമിലേക്ക് മടങ്ങി. മറഡോണ ഒപ്പുവെച്ച ലിമിറ്റഡ്​ എഡിഷൻ ഹബ്​ലോട്ട്​ വാച്ച്​ ഇയാൾ മോഷ്​ടിക്കുകയായിരുന്നു. 

ദുബൈ പൊലീസിൻറെ സഹായത്തോടെ അസം പൊലീസ്​ മോഷണം പോയ വാച്ച്​ കണ്ടെടുത്തെന്ന്​ അസം മുഖ്യമന്ത്രി ഹിമാന്ത ബിശ്വ ശർമ അറിയിച്ചു. ഇന്ന് വെളുപ്പിന്​ നാലുമണിയോടെയാണ് പ്രതിയെ പിടികൂടിയത്. ഹബ്​ലോട്ട്​ വാച്ച് കണ്ടെടുത്തെന്നും അന്വേഷണം പുരോഗമിക്കുകയാണെന്നും ശിവസാഗർ പൊലീസ്​ പറഞ്ഞു.