മോസ്കോ: നൈജീരിയക്കെതിരെ ജീവന്മരണ പോരാട്ടത്തിനിറങ്ങുന്ന അര്ജന്റീനയുടെ നായകന് ലയണല് മെസിക്ക് ജര്മന് ഇതിഹാസ നായകനായിരുന്ന ലോതര് മത്തേവൂസിന്റെ വക ഉപദേശം. നിലനില്പ്പിനായി കളിക്കാനിറങ്ങുന്ന ടീമിന് രക്ഷപ്പെടാനുള്ള ഏക വഴി എന്താണെന്ന് മത്തേവൂസ് പറയുന്നു. ലോകകപ്പില് മെസി മറഡോണയെപ്പോലെ കളിക്കണം.
'' മോസ്കോയില് നിന്ന് ഇന്നലെ അര്ജന്റൈന് ആരാധകര്ക്കൊപ്പം ട്രെയിനിലാണ് ഞാന് സെന്റ് പീറ്റേഴ്സ്ബര്ഗിലെത്തിയത്. അല്പം വോഡ്ക നുണഞ്ഞ് അവര്ക്കൊപ്പം യാത്ര ചെയ്തത് രസകരമായി. അവരുടെ സംസാര വിഷയം ഫുട്ബോളായിരുന്നു. കഴിഞ്ഞ 10 വര്ഷത്തിനിടെ ഫുട്ബോളിലെ ഏറ്റവും മികച്ച കളിക്കാരന് മെസി തന്നെയാണ്. അതുകൊണ്ടുതന്നെ അവര്ക്ക് മെസി മഹാനായ താരമാണ്. എനിക്കും അങ്ങനെ തന്നെ.
പക്ഷെ ബാഴ്സലോണക്ക് വേണ്ടി കളിക്കുന്ന മെസിയല്ല, അര്ജന്റീനക്ക് വേണ്ടി കളിക്കുന്നത്. മറഡോണയുമായി മെസിയെ താരതമ്യം ചെയ്യാനാവില്ലെന്ന് ആരാധകര് പറഞ്ഞു. കാരണം ലളിതമാണ്. മറഡോണ അവര്ക്ക് ലോകകപ്പ് സമ്മാനിച്ച നായകനാണ്. മെസി അത് നേടാത്ത താരവും. മറഡോണ എത്ര നന്നായി കളിച്ചാലും മോശമായി കളിച്ചാലും അയാള് മത്സരത്തില് പൂര്ണമായും ഇഴുകിച്ചേരും എന്നാണ് എന്റെ വ്യക്തിപരമായ അനുഭവം. മെസി അങ്ങനെയല്ല. കാര്യങ്ങള് തന്റെ വഴിക്കല്ലെങ്കില് അദ്ദേഹത്തെ പിന്നെ അധികം കാണാനാവില്ല. മറഡോണ ശരിക്കും നായകനായിരുന്നു.
മെസിയിലും മറഡോണയിലും ഞാന് ഒരുപാട് സാമ്യതകള് കാണുന്നുണ്ട്. ഇരുവരുടേയും ഉയരം, വേഗം, പന്തടക്കം, ഡ്രിബ്ലിങ് എന്നിവയിലെല്ലാം അവര് ഒരുപോലെ. എന്നാല് വൈകാരികമായി വിരുദ്ധ ധ്രുവങ്ങളിലാണ് ഇരുവരും. മറഡോണ മത്സരത്തിനാകെ ഊര്ജ്ജം പകരുന്ന കളിക്കാരനാണ്. പക്ഷെ മെസിക്ക് ആ കഴിവില്ലെന്നാണ് എന്റെ വിലയിരുത്തല്. ക്രൊയേഷ്യക്കെതിരായ മത്സരത്തിന്റെ അവസാന 20 മിനുട്ടുകളില് മെസിയെ കണ്ടതേയില്ല. അദ്ദേഹം ഡ്രസിങ് റൂമിലാണോ എന്നുപോലും സംശയിച്ചു. ടീമിന് ഏറ്റവും ആവശ്യമുള്ളപ്പോള് തിളങ്ങാന് അദ്ദേഹത്തിന് കഴിയുന്നില്ല. കാര്യങ്ങള് വിചാരിച്ചപോലെ നടന്നില്ലെങ്കില് ടീമിനെ പ്രചോദിപ്പിക്കാന് മെസിക്കാവുന്നില്ല. തലതാഴ്ത്തി നിരാശനായി നില്ക്കുന്ന മെസിയെയാണ് കാണുന്നത്. നൈജീരിയക്കെതിരേ മെസി ഊര്ജ്ജസ്വലനായി ടീമിനെ നയിച്ചാല് അര്ജന്റീന വിജയിച്ചു കയറും '
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates