ഫത്തോർഡ: ഐഎസ്എല്ലിൽ ഇന്നത്തെ മത്സരത്തിൽ കരുത്തരായ ഗോവയെ സമനിലയിൽ തളച്ച് ഈസ്റ്റ് ബംഗാൾ. ഓരോ ​ഗോളുകൾ വീതമാണ് ഇരുടീമുകളും നേടിയത്. ഗോവയ്ക്കായി ഇഗോർ അംഗൂളോ ​ഗോൾ നേടിയപ്പോൾ ഡാനിയേൽ ഫോക്‌സാണ് ഈസ്റ്റ് ബംഗാളിനായി സ്കോർ ചെയ്തത്. ഇന്നത്തെ മത്സരഫലത്തോടെ  ഗോവ പോയന്റ് പട്ടികയിൽ മൂന്നാമതും ഈസ്റ്റ് ബംഗാൾ പത്താം സ്ഥാനത്തുമാണ്. 

ഈസ്റ്റ് ബംഗാളിന്റെ ബ്രൈറ്റ് ആണ് ഇന്നത്തെ മത്സരത്തിലെ ഹീറോ ഓഫ് ദ മാച്ച് പുരസ്കാരം സ്വന്തമാക്കിയത്. മത്സരത്തിന്റെ 39-ാം മിനിട്ടിലാണ് സൂപ്പർ താരം ഇഗോർ അംഗൂളോ ടീമിനായി ഗോൾ നേടിയത്. ഈസ്റ്റ് ബംഗാളിന്റെ മധ്യനിര വരുത്തിയ പിഴവ് മുതലെടുക്കുകയായിരുന്നു ​ഗോവൻ താരം. ഗോൾ കീപ്പർ ദേബ്ജിത്തിനെ കബിളിപ്പിച്ച് പന്ത് അനായാസേന വലയിലെത്തിക്കുന്നതിൽ അംഗൂളോ വിജയിച്ചു. താരം ഈ സീസണിൽ നേടുന്ന പത്താമത്തെ ഗോളാണിത്. 

രണ്ടാം പകുതിയിലാണ് ഈസ്റ്റ് ബം​ഗാൾ ​ഗോൾ നേടിയത്. കളിയുടെ 65-ാം മിനിറ്റിലാണ് സമനില ​ഗോൾ പിറന്നത്. ബ്രൈറ്റ് എടുത്ത കോർണർ കിക്ക് നേരെ ബോക്‌സിലേക്ക് പറന്നെങ്കിലും ഗോവൻ ഗോൾ കീപ്പർ ധീരജ് തട്ടിയകറ്റി. ഇത് നേരെ ഫോക്‌സിന്റെ കാലിലാണ് എത്തിയത്. അനായാസേന പന്ത് തട്ടിയിട്ട് ഫോക്സ് ​ഗോൾ വല കുലുക്കി.