ടൗരംഗ: വിജയ വഴിയിലേക്ക് തിരിച്ചെത്തേണ്ടത് അനിവാര്യമായ മത്സരത്തില്‍ ഓസ്‌ട്രേലിയക്ക് മുന്‍പില്‍ 278 റണ്‍സ് വിജയ ലക്ഷ്യം വെച്ച് ഇന്ത്യ. ഓപ്പണര്‍മാരെ തുടക്കത്തില്‍ തന്നെ നഷ്ടമായെങ്കിലും മധ്യനിരയിലെ മൂന്ന് താരങ്ങള്‍ അര്‍ധ ശതകം പിന്നിട്ടതോടെ ഇന്ത്യ നിശ്ചിത ഓവറില്‍ ഏഴ് വിക്കറ്റ് നഷ്ടത്തില്‍ 277 റണ്‍സ് കണ്ടെത്തി. 

ഇന്ത്യക്ക് വേണ്ടി യാസ്തിക ഭാട്ടിയ 83 പന്തില്‍ നിന്ന് ആറ് ബൗണ്ടറികളോടെ 59 റണ്‍സ് നേടി. മിതാലി രാജ് നാല് ഫോറും ഒരു സിക്‌സും സഹിതം 96 പന്തില്‍ നിന്ന് 68 റണ്‍സ് എടുത്തു. ഹര്‍മന്‍പ്രീത് കൗര്‍ 47 പന്തില്‍ നിന്ന് ആറ് ബൗണ്ടറിയോടെ 57 റണ്‍സുമായി പുറത്താവാതെ നിന്നു. 

സ്‌കോറിങ് വേഗം കൂട്ടി ഹര്‍മനും പൂജയും

നേരത്തെ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഇന്ത്യക്ക് 28 റണ്‍സ് കൂട്ടിച്ചേര്‍ത്തപ്പോഴേക്കും ഓപ്പണര്‍മാര്‍ രണ്ട് പേരേയും നഷ്ടമായി. മന്ദാന 10 റണ്‍സും ഷഫലി 12 റണ്‍സും എടുത്താണ് മടങ്ങിയത്. എന്നാല്‍ മൂന്നാം വിക്കറ്റില്‍ ഒന്നിച്ച യാസ്തിക-മിതാലി സഖ്യം ഇന്ത്യയെ കരകയറ്റി. 130 റണ്‍സ് ആണ് ഇരുവരും ചേര്‍ന്ന് കൂട്ടിച്ചേര്‍ത്തത്. 

എന്നാല്‍ യാസ്തിക പുറത്തായതിന് പിന്നാലെ മിതാലി രാജും മടങ്ങി. ഇതോടെ ഹര്‍മന്‍ ക്രീസില്‍ നിലയുറപ്പിച്ചു. ഏഴാം വിക്കറ്റില്‍ പൂജാ വസ്ത്രാക്കറിനൊപ്പം നിന്ന് 64 റണ്‍സ് കൂട്ടിച്ചേര്‍ക്കാന്‍ ഹര്‍മന് കഴിഞ്ഞു. സ്‌കോറിങ്ങിന്റെ വേഗം കൂട്ടിയത് ഇവരുടെ കൂട്ടുരെട്ടാണ്. 47 പന്തില്‍ നിന്നാണ് 64 റണ്‍സ് കണ്ടെത്തിയത്. പൂജ 28 പന്തില്‍ നിന്ന് 34 റണ്‍സ് എടുത്തു.