വെല്ലിങ്ടന്: ഇന്ത്യക്കെതിരായ ഒന്നാം ക്രിക്കറ്റ് ടെസ്റ്റിന്റെ ആദ്യ ദിനത്തില് കൂട്ടത്തകര്ച്ച അതിജീവിച്ച് ന്യൂസിലന്ഡ്. ഒന്നാം ദിനം കളി അവസാനിച്ചപ്പോള് കിവികള് 5 വിക്കറ്റ് നഷ്ടത്തില് 243 റണ്സിലെത്തി. ഹെന്റി നിക്കോള്സിന്റെ സെഞ്ച്വറിയുടേയും ശതക വക്കില് നില്ക്കുന്ന ഗ്ലെന് ഫിലിപ്സിന്റേയും മികവിലാണ് അവര് മത്സരത്തിലേക്ക് തിരിച്ചെത്തിയത്. ഇരുവരും ചേര്ന്നു ആറാം വിക്കറ്റില് 173 റണ്സ് ബോര്ഡില് ചേര്ത്തു. 70 റണ്സിനിടെ 5 വിക്കറ്റുകള് നഷ്ടമായി തകര്ച്ചയെ നേരിട്ട ശേഷമാണ് കിവികള് തിരിച്ചു കയറിയത്. ടോസ് നേടിയ ഇന്ത്യ ബൗളിങ് തിരഞ്ഞെടുക്കുകയായിരുന്നു.
12ാം ടെസ്റ്റ് സെഞ്ച്വറിയാണ് നിക്കോള്സ് വെല്ലിങ്ടനില് കുറിച്ചത്. 221 പന്തുകള് നേരിട്ട് 14 ഫോറുകള് സഹിതം നിക്കോള്സ് 113 റണ്സുമായി ക്രീസില് തുടരുന്നു. ഗ്ലെന് ഫിലിപ്സ് 13 ഫോറുകള് സഹിതം 182 പന്തില് 94 റണ്സുമായും നില്ക്കുന്നു.
ഇന്ത്യക്കായി ജസ്പ്രിത് ബുംറ 3 വിക്കറ്റുകള് വീഴ്ത്തി. അന്ഷുല് കാംബോജ്, ആകാശ് ദീപ് എന്നിവര് ഓരോ വിക്കറ്റും സ്വന്തമാക്കി.
ആദ്യ ഓവറിലെ മൂന്നാം പന്തില് തന്നെ കിവീസ് ക്യാപ്റ്റന് ടോം ലാതമിനെ ബുംറ തിരിച്ചയച്ചു. ഡാരില് മിച്ചലും (1) ടോം ബ്ലണ്ടലുമാണ് (5) ബുംറയുടെ മറ്റ് ഇരകള്. ഡെവണ് കോണ്വെയെ (4) കാംബോജും രചിന് രവീന്ദ്രയെ (15) ആകാശ് ദീപും മടക്കി. പിന്നീടാണ് ഫലിപ്പ്സും നിക്കോള്സും ചേര്ന്ന് ഇന്ത്യന് പേസിനെ ക്ഷമയോടെ നേരിട്ട് കിവീസ് ഇന്നിങ്സിനെ രക്ഷിച്ചെടുത്തത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates