ന്യൂഡൽഹി: അത്ലറ്റിക്കോ മാഡ്രിഡിനെ ലാ ലീ​ഗ കിരീടത്തിലേക്ക് എത്തിച്ച സുവാരസിന് കയ്യടിച്ച് അമൂൽ കാർട്ടൂൺ. അവന്റെ കടിയേക്കാൾ  ദയനീയമാണ് ബാഴ്സ എന്നാണ് അമൂലിന്റെ പോസ്റ്ററിൽ പറയുന്നത്. 

ലാ ലീ​ഗയിലെ അവസാന മത്സരത്തിൽ കിരീടം ചൂടാൻ അത് ലറ്റിക്കോയ്ക്ക് ജയം അനിവാര്യമായിരുന്ന കളിയിൽ വയാഡോളിഡിനെതിരെ വിജയ ​ഗോൾ പിറന്നത് സുവാരസിൽ നിന്നാണ്. ആദ്യ പകുതിയിൽ ഒരു ​ഗോളിന് പിന്നിൽ നിന്നതിന് ശേഷമാണ് അവസാന പകുതിയിൽ രണ്ട് വട്ടം ​ഗോൾ വല ചലിപ്പിച്ച് അത് ലറ്റിക്കോ കിരീടം ഉറപ്പിച്ചത്. 

ഈ സീസൺ ആരംഭിക്കുന്ന സമയം സുവാരസിനെ ബാഴ്സ ഒഴിവാക്കുകയായിരുന്നു. ബാഴ്സയുടെ ഭാവി മുൻപിൽ കണ്ടുള്ള തന്റെ പദ്ധതികളിൽ സുവാരസ് ഇല്ലെന്ന് കോമാൻ വ്യക്തമാക്കി. ബാഴ്സ ആ​ഗ്രഹിക്കുന്ന നിലവാരത്തിൽ കളിക്കാൻ ഇനി സുവാരസിന് കഴിയില്ലെന്ന് പറഞ്ഞായിരുന്നു ഒഴിവാക്കൽ. 

ബാഴ്സ ഒഴിവാക്കിയപ്പോൾ രണ്ടു കയ്യും നീട്ടി അത്ലറ്റിക്കോ താരത്തെ സ്വീകരിച്ചു. 21 ​ഗോളുകളാണ് സീസണിൽ സുവാരസ് നേടിയത്. ലാ ലീ​ഗയിലെ അത് ലറ്റിക്കോയ്ക്ക് ജയം അനിവാര്യമായിരുന്ന ഒസാസുനെതിരായ കളിയിലും അവസാന മിനിറ്റുകളിൽ ​ഗോൾ വല കുലുക്കി തിരികെ കയറാൻ അത്ലറ്റിക്കോയെ തുണച്ചത് സുവാരസ് ആയിരുന്നു.