ബാസല്‍: സ്വിസ് ഓപ്പണ്‍ ബാഡ്മിന്റണ്‍ പോരാട്ടത്തിന്റെ ഫൈനലിലേക്ക് മുന്നേറി മലയാളി താരം എച്എസ് പ്രണോയ്. സെമിയില്‍ കടുത്ത പോരാട്ടം അതിജീവിച്ചാണ് പ്രണോയിയുടെ മുന്നേറ്റം. 

സെമിയില്‍ ഇന്തോനേഷ്യന്‍ താരം അന്റണി സിനിസുക ജിന്റിങിനെ വീഴ്ത്തിയാണ് മലയാളി താരം കലാശപ്പോരിനെത്തുന്നത്. ആദ്യ സെറ്റ് നേടിയ ശേഷം രണ്ടാം സെറ്റ് കൈവിട്ടതിന് പിന്നാലെ മൂന്നാം സെറ്റില്‍ തിരിച്ചടിച്ചാണ് 29കാരനായ താരത്തിന്റെ മുന്നേറ്റം. സ്‌കോര്‍: 21-19, 19-21, 21-18. 

2017ല്‍ യുഎസ് ഓപ്പണിന്റെ ഫൈനലില്‍ കടന്ന ശേഷം ഇതാദ്യമായാണ് പ്രണോയ് ഒരു അന്താരാഷ്ട്ര പോരാട്ടത്തിന്റെ ഫൈനലിലേക്ക് മുന്നേറുന്നത്.