ദുബൈ: ടി20 ലോകകപ്പ് ബഹിഷ്കരിക്കുമെന്ന പാകിസ്ഥാന്റെ ഭീഷണിക്ക് ചുട്ട മറുപടിയുമായി ഐ സി സി. പാകിസ്ഥാൻ ടൂർണമെന്റിൽ നിന്ന് പിന്മാറിയാൽ കടുത്ത ശിക്ഷകൾ നേരിടേണ്ടിവരുമെന്ന് ഐ സി സി പാകിസ്ഥാന് മുന്നറിയിപ്പ് നൽകിയതായി റിപ്പോർട്ടുകൾ. ഇത്തരമൊരു നീക്കം നടത്തിയാൽ സാമ്പത്തികമായും അല്ലാതെയും നിരവധി നഷ്ടങ്ങൾ പാകിസ്ഥാൻ ഉണ്ടാകും.

പാകിസ്ഥാൻ സൂപ്പർ ലീഗിൽ (PSL) വിദേശ താരങ്ങൾ കളിക്കാൻ അനുമതി നിഷേധിക്കുകയും ഐ സി സിയുടെ ധനസഹായം വെട്ടികുറയ്‌ക്കുകയും ചെയ്യുമെന്നാണ് പാകിസ്ഥാന് മുന്നറിയിപ്പ് നൽകിയിരിക്കുന്നത്. ഐ സി സി ഫണ്ടിംഗ് കുറയുന്നതോടെ പി‌സിബിക്ക് വലിയ വരുമാന നഷ്ടം സംഭവിക്കും. പി‌ എസ്‌ എല്ലിന്റെ അന്താരാഷ്ട്ര അംഗീകാരവും വാണിജ്യ പിന്തുണയും പിൻവലിച്ചാൽ അതും പാകിസ്ഥാന് തിരിച്ചടിയാകും.

ഏഷ്യാ കപ്പിൽ നിന്ന് ഒഴിവാക്കുക, പാകിസ്ഥാൻ ഉൾപ്പെടുന്ന എല്ലാ പരമ്പരകളും നിർത്തിവെക്കുക തുടങ്ങിയ കർശന നടപടികളും ഐ സി സി സ്വീകരിച്ചേക്കുമെന്നാണ് റിപ്പോർട്ടുകൾ പറയുന്നത്. ഇത്തരം നീക്കങ്ങൾ ഐ സി ക്ക് നടത്തിയാൽ പാക്കിസ്ഥാന് അത് കനത്ത തിരിച്ചടിയാകും. ബംഗ്ലാദേശ് സുരക്ഷാ കാരണങ്ങൾ ചൂണ്ടിക്കാട്ടി ടൂർണമെന്റിൽ നിന്ന് പിന്മാറിയതിനെ പിന്തുണച്ച് പി‌ സി ബി ചെയർമാൻ നടത്തിയ പരസ്യ പ്രസ്താവനകളാണ് ഐ സി സിയെ ചൊടിപ്പിച്ചത് എന്നാണ് റിപോർട്ടുകൾ.