ബ്രിസ്ബെയ്ന്: മഴ കാരണം ഇന്ത്യ- ഓസ്ട്രേലിയ അഞ്ചാം ടി20 മത്സരം ഉപേക്ഷിച്ചു. ഇതോടെ അഞ്ച് മത്സരങ്ങളടങ്ങിയ പരമ്പര ഇന്ത്യ സ്വന്തമാക്കി. അഭിഷേക് ശര്മയാണ് പരമ്പരയിലെ താരം. ടോസ് നഷ്ടമായി ആദ്യം ബാറ്റിങിനിറങ്ങിയ ഇന്ത്യ 4.5 ഓവറില് വിക്കറ്റ് നഷ്ടമില്ലാതെ ഇന്ത്യ 52 റണ്സെടുത്തു നില്ക്കുമ്പോഴാണ് മഴമൂലം മത്സരം നിര്ത്തിവെച്ചത്. 16 പന്തില് 29 റണ്സുമായി ശുഭ്മാന് ഗില്ലും 13 പന്തില് 23 റണ്സുമായി അഭിഷേക് ശര്മയുമായിരുന്നു ക്രീസില്. പിന്നീട് കനത്ത മഴ തുടര്ന്നതിനാല് പുനരാരംഭിക്കാനായില്ല. ഇതോടെ മത്സരം ഉപേക്ഷിക്കുകയായിരുന്നു.
പരമ്പരയിലുടനീളം ഫോം കണ്ടെത്താന് വിഷമിച്ച ഗില്, തുടക്കം മുതല് ഓസീസ് ബൗളര്മാരെ പ്രഹരിച്ചു. നേരിട്ട രണ്ടാം പന്തില് തന്നെ ഫോറടിച്ച ഗില്, മൂന്നാം ഓവറില് തുടര്ച്ചയായി നാലു പന്തുകള് ബൗണ്ടറി കടത്തി. ആറു ഫോറുകളാണ് ഗില് അടിച്ചത്. അഭിഷേക് ശര്മ ഒരു സിക്സും ഒരു ഫോറുമടിച്ചു. ടി20യില് 1000 റണ്സെന്ന നാഴികക്കലും അഭിഷേക് ശര്മ പിന്നിട്ടു. ഏറ്റവും കുറഞ്ഞ പന്തില് (528) ആയിരം റണ്സു പിന്നിടുന്ന താരമെന്ന റെക്കോര്ഡും അഭിഷേകിന്റെ പേരിലായി. ഇന്ത്യന് ക്യാപ്റ്റന് സൂര്യകുമാര് യാദവിന്റെ (573) റെക്കോര്ഡാണ് തകര്ത്തത്. ഏറ്റവും കുറവ് ഇന്നിങ്സുകളില്നിന്ന് ഈ നേട്ടം കൈവരിക്കുന്ന ഇന്ത്യന് താരങ്ങളില് വിരാട് കോഹ്ലിക്കു പിന്നില് രണ്ടാം സ്ഥാനത്താണ് അഭിഷേക് ശര്മ. വിരാട് കോഹ്ലി 27 ഇന്നിങ്സുകളില്നിന്ന് ആയിരം റണ്സു തികച്ചപ്പോള് അഭിഷേക് നേട്ടത്തിലെത്താന് എടുത്തത് 28 ഇന്നിങ്സുകള്.
അഞ്ച് മത്സര പരമ്പരയിലെ ആദ്യ മത്സരവും മഴമൂലം ഉപേക്ഷിച്ചിരുന്നു. ഇതോടെ പരമ്പരയില് രണ്ട് മത്സരങ്ങള് ജയിച്ച ഇന്ത്യ 2-1ന് ടി20 പരമ്പര സ്വന്തമാക്കി. ഓസ്ട്രേലിയക്കെതിരെ ഇന്ത്യയുടെ തുടര്ച്ചയായ മൂന്നാം ടി20 പരമ്പര ജയമാണിത്. 2023-24ലും 2022ലും ഓസ്ട്രേലിയ ഇന്ത്യയില് ടി20 പരമ്പര കളിച്ചപ്പോള് ഇന്ത്യ യഥാക്രമം 4-1നും 2-1നും പരമ്പര സ്വന്തമാക്കിയിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates