സിം​ഗപ്പൂർ: ഏഷ്യാ കപ്പ് യോ​ഗ്യതാ റൗണ്ടിന്റെ ​ഗ്രൂപ്പ് സി പോരാട്ടത്തിൽ ഇന്ത്യൻ ഫുട്ബോൾ ടീം സമനില പൊരുതി നേടി. സിം​ഗപ്പൂരിനെതിരായ പോരാട്ടത്തിൽ ഇന്ത്യ 1-1നാണ് സമനില സ്വന്തമാക്കിയത്. പത്ത് പേരായി ചുരുങ്ങിയിട്ടും ഇന്ത്യ പൊരുതി നിന്നു. മത്സരത്തിനിടെ ഇന്ത്യയുടെ പ്രതിരോധ കരുത്തൻ സന്ദേശൻ ജിങ്കാൻ ചുവപ്പ് കാർഡ് കണ്ടു പുറത്തായി. പൊരുതി സമനില പിടിച്ചെങ്കിലും ഏഷ്യാ കപ്പ് യോ​ഗ്യത നേടാനുള്ള ഇന്ത്യയുടെ ശ്രമങ്ങൾക്ക് മത്സര ഫലം തിരിച്ചടിയാണ്.

സിം​ഗപ്പൂർ ദേശീയ സ്റ്റേഡിയത്തിലാണ് മത്സരം അരങ്ങേറിയത്. ആദ്യ പകുതിയിൽ സിം​ഗപ്പൂരിന്റെ മുന്നേറ്റങ്ങളാണ് കണ്ടത്. ഇന്ത്യൻ ബോക്സിലേക്ക് നിരവധി തവണയാണ് സിം​ഗപ്പൂർ താരങ്ങൾ ഇരച്ചെത്തി. പ്രതിരോധം കടുകട്ടിയാക്കി ഇന്ത്യ അതെല്ലാം തടഞ്ഞു. ആദ്യ പകുതിയിൽ തന്നെ മുന്നിലെത്താനുള്ള അവസരം ഇന്ത്യക്കു ലഭിച്ചെങ്കിലും അതു മുതലാക്കാനായില്ല.

തുടർ ആക്രമണങ്ങൾക്ക് പക്ഷേ സിം​ഗപ്പൂർ ഇടവേളയിട്ടില്ല. വിങ്ങുകളിലൂടെ അവർ ഇരച്ചെത്തുന്നത് തുടർന്നു. അതിന്റെ ഫലം ആദ്യ പകുതിക്കു പിരിയും മുൻപ് അവർക്ക് ​ഗോളായി കിട്ടുകയും ചെയ്തു. ആദ്യ പകുതിയുടെ ഇഞ്ച്വറി സമയത്ത് ഇഖ്സാൻ ഫാൻഡി സിം​ഗപ്പൂരിനെ മുന്നിലെത്തിച്ചു.

രണ്ടാം പകുതി തുടങ്ങിയതിനു പിന്നാലെ തന്നെ സന്ദേശ് ജിങ്കാൻ ചുവപ്പ് കാർഡ് വാങ്ങി പുറത്തായത് ഇന്ത്യക്ക് കനത്ത അടിയായി. രണ്ടാം മഞ്ഞ കാർഡ് കണ്ടതോടെയാണ് ജിങ്കാൻ പുറത്തായത്. ഇതോടെ പരിശീലകൻ ഖാലിദ് ജമാൽ ഒട്ടേറെ മാറ്റങ്ങൾ വരുത്തി. ​ഗോൾ ലക്ഷ്യമിട്ടുള്ള നീക്കങ്ങൾ രണ്ടാം പകുതിയിൽ ഇന്ത്യ കടുപ്പിച്ചെങ്കിലും ലക്ഷ്യം മാത്രം കണ്ടില്ല.

ഒടുവിൽ റഹിം അലിയാണ് ഇന്ത്യ കാത്തിരുന്ന ​ഗോൾ വലയിലിട്ടത്. സമനില പിടിച്ചതോടെ ഇന്ത്യ പ്രതിരോധം കടുപ്പിച്ചതോടെ സിം​ഗപ്പൂരിനു പിന്നീട് ഒന്നും ചെയ്യാനായില്ല.

ബം​ഗ്ലാദേശിനോടും ഇന്ത്യ സമനില വഴങ്ങിയിരുന്നു. മറ്റൊരു മത്സരത്തിൽ ഹോങ്കോങിനോടു ഇന്ത്യ തോൽവിയും വഴങ്ങി. 3 മത്സരങ്ങളിൽ രണ്ട് സമനിലയും ഒരു തോൽവിയും സഹിതം ഇന്ത്യ 2 പോയിന്റുമായി മൂന്നാം സ്ഥാനത്താണ്. 5 പോയിന്റുമായി സിം​ഗപ്പൂർ ഒന്നാം സ്ഥാനത്തും.