​ഗ്ലാസ്​ഗോ: കോമൺവെൽത്ത് ​ഗെയിംസ് ബോക്സിങ് പോരാട്ടത്തിൽ പാകിസ്ഥാൻ താരത്തിനെതിരായ പ്രീ ക്വാർട്ടറിലെ തകർപ്പൻ ജയം കാർ​ഗിൽ യുദ്ധത്തിൽ വീരമൃത്യു വരിച്ച സൈനികർക്ക് സമർപ്പിച്ച് ഇന്ത്യയുടെ ജാദുമണി സിങ് മന്ദെങ്ബാം. പാകിസ്ഥാന്റെ സുമാമ റഹ്മാനെയാണ് പ്രീ ക്വാർട്ടറിൽ ഇന്ത്യൻ താരം വീഴ്ത്തിയത്. 5-0ത്തിനായിരുന്നു ജാദുമണിയുടെ ജയം.

കാർ​ഗിൽ വിജയ് ദിവസത്തിലാണ് താരം 55 കിലോ വിഭാ​ഗത്തിൽ മത്സരിക്കാനിറങ്ങിയത്. അഞ്ച് ജഡ്ജുമാരും ജാദുമണിക്കാണ് പോയിന്റുകൾ നൽകിയത്. പിന്നാലെയാണ് താരം ശ്രദ്ധേയ സമർപ്പണം നടത്തിയത്.

എന്റെ വിജയം ഞാൻ കാർ​ഗിൽ വീരൻമാർക്ക് സമർപ്പിക്കുന്നു. പാകിസ്ഥാനെതിരെ വിജയിക്കാൻ സാധിച്ചതിൽ സന്തോഷമുണ്ട്. ക്വാർട്ടറിൽ ഇതിലും മികച്ച പ്രകടനം പുറത്തെടുത്ത് ഇന്ത്യക്ക് നേട്ടം സമ്മാനിക്കാൻ ശ്രമിക്കും- താരം മത്സര ശേഷം പ്രതികരിച്ചു.

1999ലെ കാർ​ഗിൽ യുദ്ധത്തിൽ വീരമൃത്യു വരിച്ച സൈനികരെ അനുസ്മരിക്കുന്ന 27ാം കാർ​ഗിൽ വിജയ് ദിവസത്തിലാണ് താരം പാക് താരത്തെ ഇടിച്ചു വീഴ്ത്തിയത്. മത്സരത്തിലുടനീളം സർവാധിപത്യം പുലർത്തിയ മണിപ്പൂരി താരം പാക് താരത്തെ നിലംതൊടീക്കാതെ പറത്തി.

നേരത്ത ആദ്യ റൗണ്ടിൽ സ്കോട്ലൻഡ് താരം ആരോൺ കല്ലനെതിരേയും 5-0ത്തിന്റെ മിന്നും ജയം സ്വന്തമാക്കിയാണ് ജാ​ദുമണി പ്രീ ക്വാർട്ടറിലെത്തിയത്. ക്വാർട്ടർ ജയിച്ച് സെമിയിലെത്തിയാൽ ജാ​ദുമണിക്ക് മെഡലും ഉറപ്പിക്കാം. (ബോക്സിങ് സെമിയിൽ തോൽക്കുന്ന രണ്ട് താരങ്ങൾക്കും വെങ്കലം നൽകും).