അഹമ്മദാബാദ്: ഐപിഎല് 16-ാം സീസണിന് നാളെ തുടക്കം. രണ്ടുമാസം നീണ്ടുനില്ക്കുന്ന കുട്ടിക്രിക്കറ്റ് മാമാങ്കത്തിലെ ആദ്യ മത്സരത്തില് നിലവിലെ ചാമ്പ്യന്മാരായ ഗുജറാത്ത് ടൈറ്റന്സ് മുന് ചാമ്പ്യന്മാരായ ചെന്നൈ സൂപ്പര് കിങ്സിനെ നേരിടും. അഹമ്മദാബാദിലെ നരേന്ദ്രമോദി സ്റ്റേഡിയത്തില് രാത്രി 7.30 മുതലാണ് മത്സരം.
10 ടീമുകള് അണിനിരക്കുന്ന ലീഗ് റൗണ്ടിലെ മത്സരങ്ങള് 12 വേദികളിലായി നടക്കും. ടീമുകളെ രണ്ടു ഗ്രൂപ്പുകളായി തിരിച്ചിട്ടുണ്ട്. ഇടവേളയ്ക്ക് ശേഷം ഐപിഎല് മത്സരങ്ങള് ഹോം, എവേ രീതിയിലേക്ക് തിരിച്ചെത്തുന്നു എന്നതും ഈ സീസണിലെ സവിശേഷതയാണ്.
52 ദിവസം നീണ്ടു നില്ക്കുന്ന ഐപിഎല് പൂരത്തിനാണ് വെള്ളിയാഴ്ച കൊടിയുയരുന്നത്. ലീഗ് മത്സരങ്ങള് മാര്ച്ച് 31 മുതല് മെയ് 21 വരെ നടക്കും. മെയ് 28 നാണ് ഫൈനല്. ആവേശം ഉയര്ത്താനായി ഇംപാക്ട് പ്ലെയര് ഉള്പ്പെടെയുള്ള പുതിയ നിയമങ്ങളും ഇത്തവണയുണ്ട്.
മലയാളി താരം സഞ്ജു സാംസണ് നായകനാകുന്ന രാജസ്ഥാന് റോയല്സിന്റെ ആദ്യ മത്സരം ഏപ്രില് രണ്ടിനാണ്. സണ്റൈസേഴ്സ് ഹൈദരാബാദ് ആണ് എതിരാളികള്. ഗ്രൂപ്പ് എയില് മുംബൈ ഇന്ത്യന്സ്, കൊല്ക്കത്ത നൈറ്റ് റൈഡേഴ്സ്, ഡല്ഹി ക്യാപിറ്റല്സ്, ലഖ്നൗ സൂപ്പര് ജയന്റ്സ് എന്നീ ടീമുകള്ക്കൊപ്പമാണ് രാജസ്ഥാന്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള് അറിയാന് ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates