ധാക്ക: ബംഗ്ലാദേശിനെതിരായ ഒന്നാം ക്രിക്കറ്റ് ടെസ്റ്റില്‍ ന്യൂസിലന്‍ഡിനു നേരിയ ലീഡ്. ഒന്നാം ഇന്നിങ്‌സില്‍ ന്യൂസിലന്‍ഡിന്റെ പോരാട്ടം 317 റണ്‍സില്‍ അവസാനിപ്പിക്കാന്‍ ബംഗ്ലാ ബൗളര്‍മാര്‍ക്കായി. നേരത്തെ ബംഗ്ലാദേശ് ഒന്നാം ഇന്നിങ്‌സില്‍ 310 റണ്‍സെടുത്തിരുന്നു. ഏഴ് റണ്‍സ് ലീഡാണ് കിവികള്‍ സ്വന്തമാക്കിയത്. 

രണ്ടാം ഇന്നിങ്‌സ് ബാറ്റിങ് ബംഗ്ലാദേശ് ആരംഭിച്ചു. മൂന്നാം ദിനം ഉച്ച ഭക്ഷണത്തിനു പിരിയുമ്പോള്‍ ബംഗ്ലാദേശ് വിക്കറ്റ് നഷ്ടമില്ലാതെ 19 റണ്‍സെന്ന നിലയില്‍. നിലവില്‍ ആതിഥേയര്‍ക്ക് 12 റണ്‍സ് ലീഡ്. 14 റണ്‍സുമായി ഓപ്പണര്‍ സാകിര്‍ ഹസനും അഞ്ച് റണ്ണുമായി സഹ ഓപ്പണര്‍ മഹ്മുദുല്‍ ഹസന്‍ ജോയിയും ക്രീസില്‍. 

നേരത്തെ കെയ്ന്‍ വില്ല്യംസന്‍ നേടിയ കിടയറ്റ സെഞ്ച്വറിയാണ് കിവീസിനെ രക്ഷിച്ചെടുത്തത്. മുന്‍ നായകന്‍ 205 പന്തില്‍ 104 റണ്‍സെടുത്തു. 11 ഫോറുകള്‍ താരം പറത്തി. 

ഡാരില്‍ മിച്ചല്‍ (41), ഗ്ലെന്‍ ഫിലിപ്‌സ് (42), ക്യാപ്റ്റന്‍ ടിം സൗത്തി (35) എന്നിവരും പിടിച്ചു നിന്നു. മറ്റൊരാളും കാര്യമായി ബാറ്റ് ചെയ്തില്ല. 

ബംഗ്ലാദേശിനായി തയ്ജുല്‍ ഇസ്ലാം നാല് വിക്കറ്റുകള്‍ വീഴ്ത്തി തിളങ്ങി. മൊമിനുല്‍ ഹഖ് മൂന്ന് വിക്കറ്റുകളും നേടി. ഷൊരിഫുള്‍ ഇസ്ലാം, മെഹിദി ഹസന്‍ മിറാസ് എന്നിവര്‍ ഓരോ വിക്കറ്റെടുത്തു.

ഈ വാർത്ത കൂടി വായിക്കൂ

രോഹിതിന്റെ ടി20 ഭാവി? ദക്ഷിണാഫ്രിക്കൻ പര്യടനത്തിനുള്ള ഇന്ത്യൻ ടീം ഉടൻ

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ