ഹൊബാര്‍ട്ട്: ഇന്ത്യയുടെ ടി20 ടീമില്‍ നിന്നു സ്പിന്നര്‍ കുല്‍ദീപ് യാദവിനെ ഒഴിവാക്കി. ദക്ഷിണാഫ്രിക്കയ്‌ക്കെതിരായ ടെസ്റ്റ് പരമ്പരയ്ക്കു മുന്നോടിയായി നടക്കുന്ന ദക്ഷിണാഫ്രിക്ക എ ടീമിനെതിരായ ഇന്ത്യന്‍ എ ടീമിന്റെ രണ്ടാം ചതുര്‍ദിന പോരാട്ടത്തില്‍ കുല്‍ദീപ് കളിക്കും. ഇതിനായാണ് താരത്തെ ഓസ്‌ട്രേലിയന്‍ പര്യടനത്തിലുള്ള ഇന്ത്യന്‍ ടീമില്‍ നിന്നു റിലീസ് ചെയ്തത്.

ദക്ഷിണാഫ്രിക്കയ്‌ക്കെതിരായ ടെസ്റ്റ് പരമ്പരയ്ക്കു മുന്നോടിയായി താരത്തിനു റെഡ് ബോള്‍ ക്രിക്കറ്റില്‍ മതിയായ അവസരം നല്‍കുന്നതിന്റെ ഭാഗമായാണ് തീരുമാനം. ഓസ്‌ട്രേലിയക്കെതിരായ ടി20 പരമ്പരയില്‍ ഒരു മത്സരമാണ് താരം കളിച്ചത്. ആദ്യ മത്സരത്തിനുള്ള പ്ലെയിങ് ഇലവനില്‍ ഉണ്ടായിരുന്നെങ്കിലും മത്സരം മഴയെ തുടര്‍ന്നു ഉപേക്ഷിച്ചിരുന്നു.

കുല്‍ദീപ് യാദവിനു പകരം മറ്റൊരു താരത്തെ ടി20 ടീമിലേക്ക് വിളിക്കേണ്ടതില്ലെന്നു ബിസിസിഐ തീരുമാനിച്ചിട്ടുണ്ട്. ഇന്ത്യ എ ടീം ദക്ഷിണാഫ്രിക്ക എ ടീമിനെതിരായ ആദ്യ പോരാട്ടം ജയിച്ചാണ് നില്‍ക്കുന്നത്. ഋഷഭ് പന്താണ് ഇന്ത്യ എ ടീം ക്യാപ്റ്റന്‍.