കൊച്ചി: തന്നെ എഴുതിത്തള്ളുന്നവര്‍ക്കെതിരെ ഇന്ത്യന്‍ പേസര്‍ എസ് ശ്രീശാന്ത്. രഞ്ജി ട്രോഫിയിലെ ബൗളിങ്ങിന്റെ വീഡിയോ പങ്കുവെച്ചാണ് ക്രിക്കറ്റിനായി ഇനിയും ഒരുപാട് നല്‍കാന്‍ തനിക്കാവും എന്ന് ശ്രീശാന്ത് പറയുന്നത്. 

കഴിഞ്ഞ കളിയിലെ ന്യൂബോളിലെ എന്റെ പ്രകടനമാണ് ഇത്. എന്റെ മത്സരം കാണാത്തവര്‍ സ്‌കോര്‍കാര്‍ഡ് നോക്കി എന്നെ എഴുതി തള്ളാന്‍ വരരുത്. ക്രിക്കറ്റിനായി ഇനിയും എനിക്ക് ഒരുപാട് നല്‍കാനാവും. ഒരിക്കലും വിട്ടുകൊടുക്കില്ല, ട്വിറ്ററില്‍ വീഡിയോ പങ്കുവെച്ച് ശ്രീശാന്ത് കുറിച്ചു. 

രഞ്ജി ട്രോഫിയില്‍ കേരളത്തിന്റെ ആദ്യ മത്സരത്തില്‍ ശ്രീശാന്ത് പ്ലേയിങ് ഇലവനില്‍ ഇടം നേടിയിരുന്നു. മേഘാലയക്ക് എതിരെ രണ്ട് വിക്കറ്റ് വീഴ്ത്തി. എന്നാല്‍ രണ്ടാമത്തെ കളിയില്‍ ശ്രീശാന്തിന് ടീമില്‍ ഇടം ലഭിച്ചില്ല. പിന്നാലെ മധ്യപ്രദേശിന് എതിരായ മത്സരത്തിനായി പരിശീലനം നടത്തവെ ശ്രീശാന്തിന് പരിക്കേറ്റു. പരിക്കിനെ തുടര്‍ന്ന് താരത്തിന് സീസണ്‍ മുഴുവന്‍ നഷ്ടമാവും.