ആസ്റ്റന്‍ വില്ലയ്‌ക്കെതിരായ പോരാട്ടത്തില്‍ മാഞ്ചസ്റ്റര്‍ യുനൈറ്റഡിനു ഗോളില്ലാ സമനില. ടോട്ടനം ഹോട്‌സ്പറിനെ ബ്രൈറ്റന്‍ വീഴ്ത്തി. ചെല്‍സി സ്വന്തം തട്ടകത്തില്‍ നോട്ടിങ്ഹാം ഫോറസ്റ്റിനോടു സമനില പിടിച്ച് രക്ഷപ്പെട്ടു.

വിവിധ പോരാട്ടങ്ങളിലായി കഴിഞ്ഞ അഞ്ച് മത്സരങ്ങളായി മാഞ്ചസ്റ്റര്‍ ജയിച്ചിട്ടില്ല. ക്രിസ്റ്റല്‍ പാലസുമായി പ്രീമിയര്‍ ലീഗില്‍ ഗോളില്ലാ സമനില. പിന്നാലെ യൂറോപ്പ ലീഗില്‍ ട്വന്റിയുമായി 1-1നു സമനില. പ്രീമിയര്‍ ലീഗില്‍ ടോട്ടനത്തോട് 0-3ത്തിന്റെ ഹോം തോല്‍വി. യൂറോപ്പ ലീഗില്‍ പോര്‍ട്ടോയുമായി 3-3നു സമനില. പിന്നാലെയാണ് വില്ലയുമായി ഗോളില്ലാ സമനില വന്നത്. കഴിഞ്ഞ 2 വര്‍ഷമായി യുനൈറ്റഡിന്റെ പരിശീലനകനായി നില്‍ക്കുന്ന എറിക് ടെന്‍ ഹാഗ് പുറത്താകലിന്റെ വക്കിലാണ്.

നോട്ടിങ്ഹാം ഫോറസ്റ്റുമായുള്ള പോരാട്ടത്തില്‍ സമനില പിടിച്ച് ചെല്‍സി. 49ാം മിനിറ്റില്‍ ക്രിസ് വുഡിലൂടെ നോട്ടിങ്ഹാം മുന്നിലെത്തി. നോനി മദുവെകെ 57ാം മിനിറ്റില്‍ നേടിയ ഗോളാണ് ചെല്‍സിക്ക് ആശ്വാസമായത്. പോരാട്ടം 1-1നു സമനിലയില്‍ പിരിഞ്ഞു.

ത്രില്ലര്‍ പോരാട്ടത്തില്‍ 3-2ന് ബ്രൈറ്റന്‍ ടോട്ടനത്തെ സ്വന്തം തട്ടകത്തില്‍ വീഴ്ത്തി. രണ്ട് ഗോളിനു പിന്നില്‍ നിന്ന ശേഷം മൂന്നെണ്ണം തിരിച്ചടിച്ചാണ് ബ്രൈറ്റന്റെ തിരിച്ചു വരവ്.

ജര്‍മന്‍ ബുണ്ടസ് ലീഗയില്‍ തുടരെ രണ്ടാം പോരിലും ബയേണ്‍ മ്യൂണിക്ക് സമനില വഴങ്ങി. എല്ലാ മത്സരങ്ങളിലുമായി കഴിഞ്ഞ 3 പോരലും ബാവേറിയന്‍സിന് ജയമില്ല. ഫ്രാങ്ക്ഫര്‍ടുമായുള്ള പോരാട്ടത്തില്‍ ഇഞ്ച്വറി സമയത്ത് വഴങ്ങിയ ഗോളിലാണ് മുന്‍ ചാംപ്യന്‍മാര്‍ ജയം കൈവിട്ടത്. 3-3നാണ് പോരാട്ടം അവസാനിച്ചത്. കിം മിന്‍ ജെയിലൂടെ ബയേണ്‍ ലീഡെടുത്തു. എന്നാല്‍ ഫ്രാങ്ക്ഫര്‍ട് തിരിച്ചടിച്ചു. പിന്നീട് ഫ്രാങ്ക്ഫര്‍ടാണ് മുന്നിലെത്തി. മറുപടിയും പിന്നാലെ ബയേണ്‍ നല്‍കി. മൈക്കല്‍ ഒലിസെയിലൂടെ ബയേണ്‍ വീണ്ടും ലീഡെടുത്തു വിജയ പ്രതീക്ഷ കാത്തു. എന്നാല്‍ മര്‍മൗഷിന്റെ ഇഞ്ച്വറി സമയത്തെ ഗോള്‍ അവര്‍ക്ക് നിരാശ സമ്മാനിക്കുന്നതായി. മര്‍മൗഷ് ഇരട്ട ഗോളുകള്‍ നേടി.

ഇറ്റാലിയന്‍ സീരി എയില്‍ എസി മിലാന് തോല്‍വി. ഫിയോരെന്റിനെ അവരെ 2-1നു വീഴ്ത്തി. മറ്റ് മത്സരങ്ങളില്‍ റോമയെ മോന്‍സയും യുവന്റസിനെ കഗ്ലിയാരിയും 1-1 എന്ന സ്‌കോറില്‍ സമനിലയില്‍ തളച്ചു. ലാസിയോ 2-നു എംപോളിയെ വീഴ്ത്തി പട്ടികയില്‍ നാലാമത്. 16 പോയിന്റുമായി നാപ്പോളിയാണ് ഒന്നാമത്.