ലണ്ടൻ: ഇന്ത്യക്കെതിരായ ലോക ടെസ്റ്റ് ചാമ്പ്യൻഷിപ്പിൽ ഓസ്ട്രേലിയ ഒന്നാം ഇന്നിങ്സ് ലീഡ് നേടി രണ്ടാം ഇന്നിങ്സ് ബാറ്റിങിന് ഇറങ്ങി. അതിനിടെയുണ്ടായ രസകരമായൊരു സംഭവം ഇപ്പോൾ സാമൂഹിക മാധ്യമങ്ങളിൽ നിറയുന്നു. മോശം തുടക്കമാണ് അവർക്ക് രണ്ടാം ഇന്നിങ്സിൽ ലഭിച്ചത്. ഓപ്പണർമാരായ അസ്മാൻ ഖവാജ (13), ഡേവിഡ് വാർണർ (ഒന്ന്) എന്നിവരെ നഷ്ടമായി. 

വാർണറുടെ വിക്കറ്റാണ് ഓസീസിന് ആദ്യം നഷ്ടമായത്. മുഹമ്മദ് സിറാജിന്റെ പന്തിൽ വിക്കറ്റ് കീപ്പർ ശ്രീകർ ഭരതിന് ക്യാച്ച് നൽകിയാണ് വാർണർ പുറത്തായത്. ഇതിനു ശേഷം ക്രീസിൽ എത്തേണ്ട മർനസ് ലബുഷെയ്ൻ ഉറങ്ങിപ്പോയതാണ് ചർച്ചയായത്. ഇതിന്റെ വീഡിയോ വൈറലായി മാറി. 

ഫീൽഡിങിന് തൊട്ടുപിന്നാലെയാണ് ലബുഷെയ്ൻ അടക്കമുള്ളവർ ഡ്രസിങ് റൂമിലെത്തിയത്. 69.4 ഓവറാണ് ഇന്ത്യയുടെ ഒന്നാം ഇന്നിങ്സ് ബാറ്റിങിൽ ഓസീസ് കളത്തിൽ ഫീൽഡ് ചെയ്തത്. മൂന്നാമനായി ഇറങ്ങാൻ പാഡ് അടക്കം കെട്ടി ലബുഷെയ്ൻ കസേരയിൽ ഇരുന്നു. അതിനിടെ താരം ഉറക്കത്തിലേക്ക് വീണു. 

നാലാം ഓവറിലാണ് വാർണർ പുറത്താകുന്നത്. എന്നാൽ ഇതു അദ്ദേഹം അറിഞ്ഞില്ല. കാണികളുടെ ആരവം കേട്ടാണ് താരം ഞെട്ടി ഉണർന്നത്. അപ്പോഴാണ് താരം വാർണറുടെ വിക്കറ്റ് പോയതായി അറിഞ്ഞത്. ഈ വീഡിയോയാണ് ഇപ്പോൾ സാമൂ​ഹിക മാധ്യമങ്ങളിൽ നിറയുന്നത്. 

ഈ വാര്‍ത്ത കൂടി വായിക്കൂ‌

'തിരിച്ചുവരവിന്റെ സൗന്ദര്യം'- രഹാനെ എലൈറ്റ് പട്ടികയില്‍

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ