ടോക്യോ: യുവന്റസ് സൂപ്പര്‍ താരവും പോര്‍ച്ചുഗല്‍ നായകനുമായ ക്രിസ്റ്റ്യാനോ റൊണാള്‍ഡോയുടെ ഗോള്‍ നേടിയുള്ള ആഘോഷം ആരാധകര്‍ക്ക് സുപരിചിതമാണ്. ഗോളടിച്ച ശേഷം വായുവില്‍ ഉയര്‍ന്നു ചാടി കൈകള്‍ താഴേക്കിട്ട് അട്ടഹസിക്കുന്ന താരത്തിന്റെ ആഹ്ലാദ പ്രകടനം ആരാധകര്‍ നിരവധി തവണ കണ്ടിട്ടുണ്ട്. 

ടോക്യോ ഒളിംപിക്‌സ് വേദിയിലും സമാനമായൊരു ആഘോഷം നടന്നു. ഇതിന്റെ വീഡിയോ സാമൂഹിക മാധ്യമങ്ങളില്‍ വൈറലായി മാറിയിരിക്കുകയാണ് ഇപ്പോള്‍.

ഈജിപ്റ്റിന്റെ യുവ ഫെന്‍സര്‍ മുഹമദ് എല്‍സയെദാണ് ഇത്തരത്തില്‍ വിജയം ആഘോഷിച്ചത്. ടോക്യോ ഒളിംപിക്സ് ഫെൻസിങ് പോരാട്ടത്തിന്റെ ആദ്യ റൗണ്ടിൽ തന്നെ മൂന്ന് തവണ ലോക ചാമ്പ്യനും നിലവിലെ ഒളിംപിക് ചാമ്പ്യനുമായ ഫ്രാന്‍സിന്റെ യാന്നിക്ക് ബോറലിനെ അട്ടിമറിച്ചതിന് പിന്നാലെയായിരുന്നു ഈജിപ്ഷ്യന്‍ താരത്തിന്റെ കൗതുകം നിറച്ച ആഘോഷം.